ހިތާމައިގެ ކޮޅެއް ނެތެވެ. އަހުރެމެން މިހާރަކަށް އައިސް ވާހަކައެއް ފަތުރާލާއިރު، އަހުރެމެން ދައްކާ ވާހަކަތައް މަލާއިކަތުން ނުލިޔުއްވާނެކަމަށް ނުވިސްނަނީ ކަންނޭނގެއެވެ؟ ނުވަތަ، ޣާފިލްވީވަރުން ގޮސް ހަނދާން ނެތެނީ ބާވައެވެ. ދައްކަން މިއުޅޭ ވާހަކަ އަކީ ދިވެހިރާއްޖެ ޑިޖިޓަލައިޒް ކުރުމަށްޓަކައި ފަށައިގެންއުޅޭ “މޯލްޑިވްސް 2.0” އާއި ގުޅުވައިގެން އިދިކޮޅު ފަރާތްތަކުން ދައްކަމުންދާ ދޮގު ވާހަކަތަކާއި ބެހޭ ގޮތުންނެވެ.
ދޮގު ޚަބަރު ފަތުރާ އެ ފަރާތްތަކުން ބުނާ ގޮތާއި ޚިލާފަށް އިލެކްޓްރޯނިކް ވޯޓިން (އީ ވޯޓިން) ތަޢާރަފް ކުރުމުގެ ވިސްނުމެއް ސަރުކާރުގައި ނެތެވެ. އެކަންރައީސް އޮފީހުގެ ޑިޖިޓަލް ސްޓްރެޓެޖިސްޓް ވެސް ވިދާޅުވިއިރު، ކެބިނެޓުގެ މެމްބަރުންނާއި ރައްޔިތުންގެ މަޖިލީހުގެ ސަރުކާރަށް ވަފާތެރި މެންބަރުން ވެސް ވިދާޅުވަނީ “މޯލްޑިވްސް2.0” އަކީ އެއްވެސް ޙާލެއްގައި ދިވެހިރާއްޖޭގައި ވޯޓުލަމުންދާ ގޮތް ބަދަލުކުރުމަށް ކުރެވޭ މަސައްކަތެއް ނޫނެވެ. އެބޭފުޅުން މިހެން ވިދާޅުވީ 2028 ވަނަ އަހަރުގެ ރިޔާސީ އިންތިހާބުގެ ކުރިން އީ-ވޯޓިން ތައާރަފް ކުރުމަށް ސަރުކާރުން މަސައްކަތް ކުރަނީ ކަމަށާއި، ޑިޖިޓަލް ޓްރާންސްފޯމަޝަން އިނިޝިއޭޓިވް އަކީ އޭގެ ފެށުން ކަމަށް ބުނެ އިދިކޮޅު ލީޑަރުންގެ ޝައްކުތައް އިތުރުވަމުންދާތީ ދަނޑިވަޅެއްގައެވެ.
އެސްޓޯނިއާ ފަދަ ކާމިޔާބު ގްލޯބަލް މޮޑެލްތަކުގެ މައްޗަށް ބިނާކޮށް ޑިޖިޓަލް ގަވަރނަންސް ކުރިއެރުވުމަށް ރައީސް ޑރ. މުޙައްމަދު މުޢިއްޒު މަސައްކަތް ކުރައްވަނީ އެއްވެސް ޙާލެއްގައި މިހާރު ވޯޓު ލަމުންދާ ގޮތް ބަދަލުކުރައްވާކަށް ނޫނެވެ. ކުރައްވަން އުޅުއްވާ ކަމަކީ ކޮރަޕްޝަނުގެ ދޮރު ބަންދުކުރުމެވެ. ޚިދުމަތްތައް އަވަސްކޮށްދިނުމެވެ. ފުޅާކުރުމެވެ. އެއްވެސް ހާލެއްގައި މިއީ އިންތިޚަބުތައް މެނިލުއަލް ކުރުމާއި ގުޅުންހުރި ކަމެއް ނޫނެވެ. ގެންނަން މިއުޅެނީ ޑިޖިޓަލް ނިޒާމެކެވެ. މަސްވެރިކަމުން ފެށިގެން ސަތުކަރުގެ އިދާރާތަކާއި ހަމަޔަށެވެ. މިސާލަކަށް ބަލާނަމަ މަސްބޯޓުފަހަރަށް މަސްވެރިން ބާނާ މަސް ކިރާއިރު ބޭނުންކުރަނީ ޑިޖިޓަލް ކައްޓާއެއް ނޫނެވެ. އެހެންކަމުން މަސްވެރިން ބާނާ މަހުގެ އަސްލު ބަރުދަން ސީދާސީދާ މިނުންމިނަށް ނޭނގެއެވެ. އެއީ މަސްވެރިންނަށް ލިބޭ ގެއްލުމެކެވެ. ކޮންމެ ކިލޯއަކުން ވިއްސަކަށް ގުރާމް ގެއްލިގެންދާ ކަމަށްވާނަމަވެސް އެއީ ރާއްޖޭގެ މަސްކާރުޚަނާތަކަށް މަދުވެގެން ދުވާލަކު 100 ޓަނު މަސް ވަންނަކަމުގައި ވިޔަސް ފާއިތުވި 3 ވެރިކަމުގައި މަސްވެރިންގެ އަތުން އެންމެ މަދުވެގެންވެސް ގެއްލިގެންދާ 10.95 ޓަނުގެ މަހެވެ. އެއަށްވާ ފައިސާއެވެ. ސަލާމަތްކުރާން މިއުޅެނީ މިފަދަ ކަންކަމެވެ. ޑިޖިޓަލައިޒް ކުރަނީ މިކަންކަމާހެދިއެވެ. ރައްޔިތުންނަސް ފަސޭހަ ކުރުމަށެވެ.
އިދިކޮޅު ފަރާތްތަކުން މިފަދަ ވާހަކަތައް މިދައްކަނީ ރައްޔިތުން ވާވެއްދުމަށެވެ. ރައީސް މުޢިއްޒުގެ ވިސްނުންފުޅަކީ މިހާރުވެސް ވޯޓުލާ ގޮތަށް ކަރުދާހުގައި ވޯޓުލާށެވެ. އީ-ވޯޓިން ފުރަތަމަ ތައާރަފްކުރި ޔޫރަޕްގެ ގައުމުތަކުން ވެސް އިތުބާރުގެ މައްސަލަތަކާއި ގުޅިގެން ކަރުދާހުގައި ވޯޓުލުމަށް އެމީހުންގެ ސިސްޓަމް އަލުންބަލުން ބަދަލުކޮށް، އިންތިޚާބުތަކުގައި ވޯޓު ކަރުދާހަށް އެނބުރި އައިސްފައިވާ ކަމަށް ފާހަގަކުރެވެއެވެ.
“މޯލްޑިވްސް 2.0” ގެ ތަސައްވުރަކީ އާންމުންނަށް ލިބިދޭ ހިދުމަތްތަކާއި، ރައްޔިތުންގެ ވެރިކަން ހިންގުމާއި، ޤައުމީ އިގްތިސާދު ބަދަލުކުރުމަށް ފަރުމާކޮށްފައިވާ ތަޞައްވުރެކެވެ. ރައްޔިތުންގެ ޓެކްސްފައިސާއިން ވައްކަންކުރުން ނިމުމަކަށް ގެނައުމެވެ. ސަރުކާރުގެ މުވައްޒަފުންނަށް ނުވަތަ ތިންބައިކުޅަ އެއްބައި މީހުންނަށް ގޭގައި، ޢާއިލާ ކައިރީގައި ތިބެގެންވެސް މަސައްކަތް ކުރުމުގެ ފުރުސަތު ލިބޭނެ ގޮތް ހެދުމެވެ. ރައްޔިތުން ބޭނުންވާނީ ލުއިފަސޭހަ ގޮތްތަކެވެ. ރައީސް ބޭނުންފުޅުވެގެން އުޅުއްވަނީ މި ލުއި ގޮތްތައް ރައްޔިތުންނަށް ހޯދައިދީ ޤައުމު ކުރިއަރުވާށެވެ.
އަބްދުﷲ ޔާމީން އާއި އެމްޑީޕީ އާއި އަދިވެސް ޤައުމުގައި ތިބި ކޮރަޕްޝަނުން މަންފާ ހޯދާ ފަރާތްތަކުން ރައްޔިތުންނަށް ވިސްނުވައިދެއްވަނީ ޑިޖިޓަލް ޕުޝް އަކީ އިންތިހާބު އޮޅުވާލުމަށް ޖަހާ ޗައްކަރެއް ކަމަށެވެ. ޔިތުންނަށް އޮޅުވާލައި ސަރުކާރާއި ރައްޔިތުން ޖައްސަން ފަތުރާ ހީލަތްތެރި ވާހަކަތަކެވެ. އެބޭފުޅުންގެ މި ތުހުމަތުތަކަކީ އަސާސެއް ނެތް ސިޔާސީ ވާހަކަތަކެކެވެ.
ސަރުކާރުން ފޯކަސް ކުރަނީ ދެފުށްފެންނަ ނިޒާމަކަށެވެ. ފަހަރެއްގައި ވެސް އީ-ވޯޓިން އަށް ނޫނެވެ. އިދިކޮޅު ފަރާތްތަކުން ދައްކާ ވާހަކަތަކަކީ ދޮގު އަދި ގައުމީ ޑިޖިޓަލް ޓްރާންސްފޯމަޝަންގެ ހަގީގީ ފައިދާ ރައްޔިތުންނަށް އޮޅުވާލުމަށްޓަކައި ދައްކާ ވާހަކަތަކެކެވެ. އެމީހުން މިހާރު އެ ޖެހިލުންވަނީ ފައިސާދީގެން ރިސޯޓުތަކާއި ފަޅުރަށްތައް “ކަޓުވާނުލެވޭތީއެވެ”. ޑިޖިޓަލައިޒް ކުރީމާ، ރަށްތަކަށް ކުރިމަތިލާ މީހުންނާއި، ޕްރޮޕޯސްކުރާ އަގާއި، ވަގުތު ވެސް ފެންނަން އޮންނާނެއެވެ. ކޮރަޕްޝަނުގެ ދޮރު ބަންދުވާނެއެވެ.
