އިޒްރޭލާއި އެމެރިކާ ފަލަސްޠީނުގައި ހިންގާ ނަސްލު ނައްތާލުމުގެ ޖަރީމާތަކުގެ ބޭނުމަކީ ޙަމާސް ނަށްތާލުމަށް ކަމަށް ބުނި ނަމަވެސް އިޒްރޭލާއި އެމެރިކާގެ ސިޔާސަތު މިއަށްވުރެ ނުރައްކާތެރިއެވެ. ޙަޤީޤީ ބޭނުމަކީ ފަލަސްޠީނުގެ ދައުލަތެއް ، އުފެދުނަ ނުދިނުމާއި އެކަމަށް މަސައްކަތްކުރާ ކޮންމެ ފަރާތެއް ނައްތާލުމެވެ. ،ޙަމާސް ނައްތާލުމަށް ފަހު ފަލަސްޠީނުގެ ފަތަޙަ ޖަމާއަތުން ވެސް ފަލަސްޠީނުގެ މިނިވަން ދައުލަތެއް ޤާއިމުކުރުމުގެ މަސައްކަތްކުރާ ނަމަ ފަތަޙަ ޖަމާޢަތް ވެސް ނައްތާލާނެކަމަށް މިހާރު އިޒްރޭލުން ވަނީ ބުނެފައެވެ.
ފަތަޙަ ޖަމާޢަތަކީ ބައިނަލްއަޤުވާމީ ގޮތުން ފަލަސްޠީނުގެ ރައްޔިތުން ތަމްޘީލު ކުރާފަރާތް ގޮތުގައި އދ.އިން ޤަބޫލުކުރާ ޖަމާޢަތެވެ. މިގޮތަށް އދ. އިން ވެސް އިސްލާމީ ޤައުމުތައް ހިމެނޭ އޯ.އައި.ސީ އިން ވެސް ނިންމާފައިވަނީ އެމެރިކާ އާއި އިޒްރޭލުން ރުހޭ ގޮތަކީ އެއީ ކަމަށް ވާތީއެވެ.
ފަތަޙަ ޖަމާޢަތަކީ އިޒްރޭލާއި ހަނގުރާމަ ނުކޮށް ހަމައެކަނިވާހަކަ ދައްކައިގެން ފަލަސްޠީނުގެ މިނިވަންކަމަށް މަސައްކަތްކުރާ ހަމައެކަނި އެމެރިކާ އާއި އިޒްރޭލާއި ހުޅަގުގެ އިސްތިޢުމާރީ ބާރުތައް ބޭނުންވާހާ ގޮތަކަށް ޢަމަލު ކުރާ ފަލަސްޠީނުގެ ޖަމާޢަތެވެ. ފަލަސްޠީން އޮތޯރިޓީ ރާމަށްﷲގައި ހިންގަނީ ފަތަޙަ ޖަމާޢަތެވެ. ފަތަޙަ ޖަމާޢަތުގެ މިހާރުގެ ވެރިއަކީ މަޙުމޫދު ޢައްބާސް އެވެ.
ފަލަސްޠީން އޮތޯރިޓީ އަށް އިސްލާމީ ޤައުމުތަކުން ކިޔަނީ ފަލަސްތީންގެ ސަރުކާރެވެ. އިޒްރޭލުން ދެކެނީ ފަލަސްޠީން އޮތޯރިޓީ އަކީ ފަލަސްޠީނުގެ ރައްޔިތުންގެ ޢާއްމު ޚިދުމަތުގެ ކަންކަން ބަލަހައްޓާ މުނިސިޕަލް ކައުންސިލްކަމުގައެވެ. އެމެރިކާ ގެ ނުފޫޛު ގެ ދަށުގައިވާ މިޞްރާއި ސައޫދީ އާއި އުރުދުން އާއި ބަހުރައިނު އާއި ޔޫ އޭ. އީ. ފަދަ ޤައުމުތައް އެހީތެރިކަން ފޯރު ކޮށްދެނީ ފަތަޙަ ޖަމާޢަތަށެވެ. ފަލަސްޠީނުގެ މިހާރު ގެ ހާލަތަށް ބަލާއިރު ، ޙަމާސް ޖަމާޢަތް ކޮންޓްރޯލްކުރާ ޣައްޒާގެ ބިމުގެ ބޮޑު ސަރަހައްދަކަށް އިޒްރޭލުން ވެރިވެ ގަތުމަށް ފަހު އިޒްރޭލުގެ ވިސްނުންހުރީ ފަލަސްޠީނު ގެ ހުރިހާ ބިމެއްގެ މައްޗަށް ވެރިވެ ގަތުމަށެވެ.
