އިޒްރޭލުގެ އަނިޔާވެރި ބޮޑުވަޒީރު ނަތަންޔާހޫ އާއި ކުރީގެ ދިފާޢީ ވަޒީރު. ފަލަސްޠީނުގައި ހިންގާ ޤަތުލު ޢާއްމުތަކާއި އިންސާނިއްޔަތާއި ޚިލާފް ޖަރީމާތައް ހިންގުމުގައި ބައިވެރިވާކަން ސާބިތުވެފައިވާތީ ، ދަ ހޭގުގައި ހުންނަ ބައިނަލް އަޤުވާމީ ކްރިމިނަލް ކޯޓުން މިދެމީހުން ހައްޔަރުކުރުމަށް ނެރެފައިވާ ޢަމުރު އުވާލުމަށް އެދި އިޒްރޭލުގެ އެޓާރނީ ޖެނެރަލްގެ ނާއިބު ޤީލާދު ނަވާ 9 މޭ 2025 ގައި އެކޯޓަށް ލިޔުންތަކެއް ފޮނުވާފައި ވާކަމަށް ރިޕޯޓުތައް ބުނެފިއެވެ.
ދުނިޔޭގެ ކޯޓުން އެދެ މީހުންގެ އިތުރުން ޙަމާސްގެ ލީޑަރެއް ކަމަށްވާ އިބްރާހީމް މިޞްރީ ހައްޔަރުކުރުމަށް ޢަމުރު ނެރެފައިވަނީ ، ފާއިތުވި 2024 ވަނަ އަހަރުގެ ނޮވެމްބަރު މަހުގައެވެ. އެހެން ނަމަ ވެސް އެޢަމުރު ނެރެފައި ވަނިކޮށް އިޒްރޭލުން އިބްރާހީމް މިސްރީ ޝަހީދު ކޮށްލާފައިވާކަން ކަށަވަރު ކޮށްދީފައިވުމުން އޭނާގެ މައްޗަށް ނެރުނުޢަމުރު ކޯޓުން ވަނީ ބާޠިލު ކޮށްފައެވެ.
ދުނިޔޭގެ ކޯޓުން ނަތަންޔާހޫ ހައްޔަރުކުރުމަށް ޢަމުރު ނެރިފައިވަނީ ، އެމެރިކާގެ ސަރުކާރާއި ނަތަންޔާހޫ އެކޯޓުގެ ފަނޑިޔާރުންނަށް ބިރު ދައްކަމުން ދަނިކޮށެވެ. ޢަމުރު ނެރުމާއެކު އެމެރިކާ އިން ވަނީ، އެކޯޓުގެ ފަނޑިޔާރުން އެމެރިކާ އަށް އެރުއްވުން މަނާކޮށް ބައެއް ކަހަލަ ދަތިކުރުމުގެ ފިޔަވަޅުތައް އަޅާފައެވެ. އަދި ޢަމުރު ބޮލާލާ ޖަހައި އެމެރިކާ އާއި ހުޅަގުގެ ބައެއް ޤައުމުތަކަށް ނަތަންޔާހޫ ރަސްމީ ދަތުރުތައް ކޮށްފައިވެއެވެ.
