فلسطين ގައި އިޒްރޭލާއި އެމެރިކާ އާއި އިނގިރޭސިވިލާތާއި ،ޖށރުމަނީ އާއި ހަންގޭރީ އާއި ފްރާންސުން ފާޅުގައި ހަތިޔާރު ދީގެން ފަލަސްޠީނުގެ ބިންތައް ފޭރުމަށް ހިންގާ ޤަތުލު ޢާއްމު ފަދަ ހާލަތަކަށް އެއްވެސް މުސްލިމު ޤައުމެއްގެ ހާލަތު ގޮސްފިނަމަ ޖިހާދު ވާޖިބު ނުވާންވީ އެއްވެސް ސަބަބެއް ، ނޯންނާނެއެވެ . އެހެން ނަމަ ވެސް ޖިހާދަށް ދިޔުމަށް ނިކުންނަންވާނީ ، ޙާކިމު ޤައުމުގެ ވެރިމީހާ ހުއްދަ ދިނުމުންނެވެ.
ޖިހާދަށް ދިޔުމުގެ ކުރިން މައިންބަފައިންގެ ހުއްދަ ހޯދަންޖެހޭނެއެވެ. މައިންބަފައިންނާއި އަނބި ދަރިން ބަލާނެ މީހަކު ނެތި އެފަދަ ހާލަތެއްގައި ވެސް ޖިހާދަށް ގޮސް ގެން ނުވާނެއެވެ. ކޮންމެ މީހަކަށް ވެސް އެމީހެއް ފުރާނަ އާއި މުދަލާއި ޢަބުރު ރައްކާތެރި ކުރުމުގެ ޙައްޤު އިސްލާމް ދީނުގައި ލިބިދެއެވެ.
ޤާނޫނީ ގޮތުންނާއި ޝަރްޢީ ގޮތުން މައިންބަފައިންނާއި އަނބި ދަރިންނަކީ ވެސް ތިމާ އެވެ. ތިމާ ބަލަހައްޓަންޖެހޭ މީހުންގެ ޙައްޤުތަކާއި އެމީހުންގެ ފުރާނަ އާއި މުދަލާއި ޢަބުރު ރައްކާތެރި ކުރުމު ގެ ޒިންމާ ހަނދާނުން ކެހިގެން ދިޔަދީގެން ނުވާނެއެވެ.
އިޒްރޭލުން ފަލަސްޠީނުގެ ބިންތަކާއި މުސްލިމުންގެ މުޤައްދަސް ތަންތައް ފަނާކުރަމުން އަންނައިރު ، ފަލަސްޠީނާއި އެއްބޯޑަރު ހިއްސާކުރާ ޢަރަބި ޤައުމުތަކުން ބޯޑަރުތައް ، ބަންދުކޮށްގެން އިޒްރޭލާއި އެމެރިކާއަށް އެއްބާރުން ދޭން ނުތިބެ ، ޢާއްމު ރައްޔިތުންގެ އިހްސާސްތަކަށް އިޚްތިރާމުކޮށް ރައްޔިތުންގެ އާދޭސްތައް ޤަބޫލުކޮށް ދޮރުތައް ހުޅުވާލައި އަނިޔާ ލިބެމުންދާ ފަލަސްޠީނުގެ މުސްލިމުންގެ ފުރާނަ ސަލާމަތްކުރުމަށް ހުރިހާ މާނައެއް ގައި އެހީތެރިވެދިނުމަކީ ދީނީ އަދި ޤައުމީ ވާޖިބެއްކަމަށް ދެކެންޖެހެއެވެ ،
އެމެރިކާ އާއި އިނގިރޭސިވިލާތާއި ޖަރުމަނާއި ، ހަންގޭރީ އާއި އޮސްޓްރޭލިޔާ އާއި ފްރާންސް ފަދަ އިސްތިޢުމާރީ ދައުލަތްތަކުން ފާޅުގައި ، މުސްލިމުން މެރުމަށް އިޒްރޭލަށް ހަތިޔާރު ފޯރު ކޮށްދެމުން އަންނަ އިރުގައި ، ހަތިޔާރުގެ ގޮތުން ބާރުގަދަ އިސްލާމީ ޤައުމުތަކުން މިފަދަ ޖަރީމާތައް ބަލަން މަޑުކުރަނީ އެއްވެސް ވެރިއެއްގެ ކިބާގައި ޣީރަތްތެރިކަމެއް ލަދުވެތިކަމެއް އިޙްސާސެއް އީމާންތެރިކަމެއް ނެތީމާ ހެއްޔެވެ ؟ ނުވަތަ މިއީ ، އެ ވެރިންގެ އަޞްލު ޙަޤީޤަތް ޢާއްމު ރައްޔިތުންނަށް ފާޅުވުމަށް ﷲ މެދުވެރި ކުރައްވާ އިމްތިހާނެއް ބާވައެވެ؟
ބައެއް ޢަރަބި ޤައުމުތަކުގެ ޢާއްމު ރައްޔިތުން ކެކިއަރާއިރު ، ޢަރަބި ޤައުމުތަކުގެ ވެރިންނަށް ހިރުވާވެސް ނުލާކަހަލައެވެ، !؟ އިޒްރޭލުގެ ޖަރީމާތައް ކުށްވެރިކުރުމަށް ކުށްލި ޖަލްސާތައް ބާއްވާ ކުށްލި ޤަރާރުތައް ނެރޭތާ ވެސް ޤަރުނެއް ވަނީ އެވެ ، އިތުރުކަމެއް ކުރާތަނެއް ނުފެނެއެވެ، ބޮޑެތި ޖާފަތްތަކާއިއެކު ޖަލްސާތަކާއި ކޮންފަރެންސްތައް ބާއްވައިގެން ، އެކަމަށް ކުރާ ޚަރަދުތަކާއި ގާތްކުރާ ނަތީޖާ އެއްވެސް ނުނެރެވެއެވެ ، ހަމައެކަނި ޖަރީމާތައް ކުށްވެރި ކުރުމަށް ޤަރާރެއް ނެރުމަށް އެވަރު ބޮޑެތި ޚަރަދު ކުރުން އިޝްރާފަކަށް ނުވާނެ ހެއްޔެވެ؟
މިއީ ލަދުގަންނަންޖެހޭ ވަރު ކަމެކެވެ ، ފަލަސްޠީނުގެ މައްސަލާގައި ދުނިޔޭގެ ޤައުމުތަކާއި އދ. އާއި އިންސާނީ ޙައްޤުތަކާއި ބެހޭ އިދާރާތަކާއި އީ.ޔޫ . އާއި ކޮމަންވެލްތު ފަދަ އިދާރާތަކުން ޢަމަލުކުރަމުން ގެންދާ ގޮތުން މުސްލިމުންނަށް އޮތް ފިލާވަލަކީ ، މުސްލިމުންގެ ޙައްޤުތައް ހިމާޔަތްކުރާނެ ޤައުމެއް އިދާރާއެއް ނެތެވެ، މުސްލިމުން އަމިއްލައަށް މުސްލިމުން ގެ މަޞްލަޙަތުތައް ހިމާޔަތްކުރާށެވެ .
މުސްލިމުންނަށް ލިބެންވާވަރު ލިބެން އޮތީ އަދި މުސްލިމުންގެ ފުރާނަ އާއި މުސްލިމުންގެ މުދަލާއި ޢަބުރު ރައްކާތެރި ކުރެވެން ވެސް އޮތީ ، ﷲގެ ވަޙީ އާއި ރަސޫލާ محمد صلى اللّه عليه وسلّم ގެ ރިސާލަތުގައި ހިފުމުންކަމެވެ، އެކަތިގަނޑެއް ގޮތުގައި ﷲގެ ދީނުގައި ހިފަހައްޓައިގެން ތިބެ އިސްލާމީ މުޅި އުއްމަތް އެކުގައި ، މަސައްކަތްކޮށްގެން އެހީތެރިވެގެންކަމެވެ ،
އެހެން ނޫނީ މުސްލިމުން ވާނީ އިޙްސާސް ކެނޑިފައިވާ ޟަމީރު މަރުވެފައިވާ މުސްލިމުންގެ ނަމުގައި ތިބި ދީނަށް ހަޒޫޖަހާ ބަޔަކަށެވެ. ފުރައްސާރަ ކުރާ ބަޔަކަށެވެ ، މިވަގުތު މުސްލިމުންނަށް ދިމާވެފައިވާ ހާލަތަކީ ، ހިމާރެއް ފަދައިން ހަޅޭލަވައި އަޑުގަދަކުރަން ތިބެންޖެހޭ ހާލަތަށްވުރެ ނުރައްކާތެރި ހާލަތެއްކަން ދަންނަން ޖެހޭ ނޫންހެއްޔެވެ .
