ޣައްޒާ މައްސަލަ އާއި ވެނެޒުއެލާގެ މައްސަލަ އާއި ގްރީންލޭންޑުގެ މައްސަލަ ބޮލަށް ލައިގެން އުޅެމުން އީރާނާއި ކުރިމަތިލާން މަސައްކަތް ކުރަމުންދާ އެމެރިކާގެ ރައީސް ޑޮނަލްޑް ޓްރަމްޕުގެ ޞިއްޙީ ޙާލަތާއި މެދު އޭނާގެ ގާތް މީހުންގެ މެދުގައި ކަންބޮޑުވުން އުފެދިއްޖެއެވެ.
މިހާރަކަށް އައިސް ކެބިނެޓްގެ ބައްދަލުވުންތަކުގައި ވެސް ޓްރަމްޕުގެ ދެލޯ މެރޭ މަންޒަރު ވަރަށް ގިނައިން ފެނެއެވެ.
ޓްރަމްޕް މިހާރު ނިދަނީ އެންމެ ހަތަރު ގަޑިއިރާއި ފަސް ގަޑިއިރާއި ދެމެދުގެ ވަގުތެއްގައި ކަމަށާއި އެކަމުގެ ސަބަބުން އިސް އެހީތެރިންގެ މެދުގައި ވެސް ވަނީ ކަންބޮޑުވުން އުފެދިފައި ކަމަށް މަސްދަރުތަކުން ބުނެއެވެ.
ޓްރަމްޕަށް މިހާރު ނިދެނީ ރޭގަނޑު ދަންވަރު 1 އާއި 5 އާއި ދެމެދުގައެވެ. ރިޕޯޓްތައް ބުނާ ގޮތުގައި އެމެރިކާގެ ރައީސް ހަފްތާ ބަންދުގައި ނިދާލަން ޖެހޭ ކަމަށް ބުނާ ވާހަކައަށް އިޝާރާތް ކޮށް ނިއުޔޯކް މެގަޒިން އަށް އެމެރިކާ ސަރުކާރުގެ އިސް މީހަކު ދިން ބަސްދީގަތުމެއްގައި ބުނީ ޓްރަމްޕް “ވެއްޓިދާނެ” ކަމަށެވެ.
ޓްރަމްޕަށް ބައްޔެއް ޖެހިފައިވާ ކަމަށް ވެސް އެއްބަޔަކު ބުނެއެވެ. ނަމަވެސް އެމެރިކާ ސަރުކާރުން އެ ވާހަކަތައް ދޮގުކުރެއެވެ.
