އިސްރާއީލްގެ ޕާސްޕޯޓް ރާއްޖޭގައި މަނާކުރުމާއެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް ތަޢުރީފްތައް އޮހެން ފަށައިފިއެވެ.
މިއަދު ބިތުފަންގި އަށް މީހަކު އޭނާގެ ޝުޢޫރުތައް ހާމަކުރަމުން ބުނީ ދުނިޔޭގެ އެއްވެސް މުސްލިމު ލީޑަރަކަށް އިސްރާއީލާއި ދެކޮޅަށް އަޅަން ނުކެރުނު ފިޔަވަޅު ރައީސް މުޢިއްޒު އެޅުއްވީ ހިތުގައި އޮތް އީމާންތެރިކަމުގެ ސަބަބުން ކަމަށް ޤަބޫލުކުރެވޭ ކަމަށެވެ.
މުޢިއްޒަށް ކެރޭނެ އެ ބިލް ތަސްދީގު ނުކޮށް ފޮނުވާލަން. އެކަމަކު އެކަމެއްވެސް ނުކުރޭ ނޫންތޯ؟ އޭގެ ބަދަލުގައި ފެނުނީ ޙިކުމަތްތެރިކަމާއެކު ޕްރެޝަރުތަކަށް ލޯމަރާލާފަވެސް މުސްލިމުންގެ ޙިމާޔަތުގައި އެކްޝަން ނެންގެވި މަންޒަރު.
ރައީސް މުޢިއްޒުގެ ނިންމުމަށް ތަޢުރީފްކޮށް ރައްޔިތުން މިއަދު ސޯޝަލްމީޑިއާގައި އެމީހުންގެ އުދާސްތައް ވެސް އޮއްސާލިއެވެ.
ފަލަސްތީނުގެ ބިންތައް ފޭރުމަށް އިޒްރޭލުން ލޭއޮހޮރުވާތާ ޤަރުނެއްވަނީ އެވެ، އެކަމާ ނުރުހި ކުށްވެރިކޮށް މުސްލިމުން މުޒާހަރާކޮށް ޖަލްސާ ތަކާއި ކޮންފަރެންސް ތައް ބާއްވައި ، ބަޔާންތަކާއި ޤަރާރުތައް ނެރޭތާ ވެސް ޤަރުނެއް ވަނީއެވެ، އިޒްރޭލުން ކުރާކަމެއް ކުރެއެވެ، އެމެރިކާ އާއި ފްރާންސް ، އިނގިރޭސިވިލާތާއި ޖަރުމަނާއި އިޓަލީ އާއި ޕޮލެންޑާއި ހަންގޭރީ އާއި މިނޫނަސް މުސްލިމުންގެ މައްޗަށް ޢަދާވާތްތެރިކަން ގެންގުޅޭ ހުޅަގުގެ ޤައުމުތަކުން ، ފާޅުގައި އިޒްރޭލަށް ހަތިޔާރު ފޯރުކޮށްދެމުން ގެންދެއެވެ، ފަލަސްޠީނު ގެ ރައްޔިތުން ޔަހޫދީން ގެ އަޅުވެތިކަމުން ސަލާމަތްވުމަށް ޖިހާދު ކުރަމުން އަންނަތާ ޤަރުނަކާ ގާތަށް ދަނީއެވެ. އެކަމަކު ރައީސް މުޢިއްޒު ނޫނީ މިފަދަ ފިޔަވަޅެއް އަޅުއްވަން ކެރިވަޑައިގަތް ހަމަ އެއްވެސް ރައީސަކު ނެތެވެ.
ފަލަސްޠީނުގެ ރައްޔިތުން ސަލާމަތް ކުރުމުގެ ޝައުޤުވެރިކަމެއް ، ފަލަސްޠީނާއި ޖެހިގެން އޮތް އެއްވެސް ޢަރަބި ޤައުމެއްގެ ވެރިއެއްގެ ހިތަކު ނެތެވެ، އެއަށްވުރެ ބޮޑަށް އެބައި މީހުންގެ ޣީރަތްތެރިކަން ވަނީ ގެއްލިފައެވެ، ރައްޔިތުން ބައިވެރިކުރުމެއް ނެތި ހިންގާ އަމިއްލަ ވެރިކަން ހިމާޔަތް ކުރުމަށްޓަކައި އަމިއްލަ ޤައުމުގެ ރައްޔިތުންގެ މައްޗަށް ހިންގާ ލާއިންސާނީ އަނިޔާތައް ކުޑައެއް ނޫނެވެ ، އެހެންކަމުން ރައްޔިތުންގެ އިޙްސާސްތަކަށް އިޚްތިރާމު ކުރުމުގެ އާދައަކީ މިޔަދުގެ ޢަރަބި ދައުލަތްތަކުގެ ވެރިންގެ ކިބާގައި ނެތް އެއްޗެކޭ ބުނެވޭނެ ޖާގަ އެބައޮތެވެ. މުސްލިމު އުންމަތުން ފަލަސްޠީނަށް ދޭންވީ ޤަދަރު ދިން ރައީސެއް މި އުޑުދަށުގައި ރައީސް މުޢިއްޒު ނޫނީ ނެތެވެ.
