ޣައްޒާގައި އިސްރާއީލުގެ ސިފައިން ޝަހީދުކޮށްލި ފަސްއަހަރުގެ ފަލަސްތީނުގެ އަންހެން ކުއްޖެއްގެ އެންމެ ފަހު ވަގުތު ތަކަށް ބިނާކޮށް ކުޅެފައިވާ ފިލްމު “ދަ ވޮއިސް އޮފް ހިންދު ރަޖަބް” އަށް އޮސްކާގެ އެންމެ މޮޅު ފީޗާ ފިލްމު ކެޓަގަރީން އެކެޑެމީ އެވޯޑަށް ނޮމިނޭޓް ވެއްޖެއެވެ.
ޓިއުނީޝިއާގެ ފިލްމު ޕްރޮޑިއުސަރު ކައުތަރު ބެން ހާނިއާ ޑައިރެކްޓްކޮށްފައިވާ މި ފިލްމުގައި ކިޔައިދެނީ 2024 ވަނަ އަހަރުގެ ޖެނުއަރީ މަހުގެ 29 ވަނަ ދުވަހު އިސްރާއީލުގެ ސިފައިން ޣައްޒާ ސިޓީގައި ބަޑިޖަހައި، ޒަޚަމް ކޮށްލުމުން ޝަހީދުވި ހިންދު ރަޖަބްގެ ހަގީގީ ވާހަކައެވެ.
ފަލަސްތީނުގެ ރެޑް ކްރެސެންޓުން ބުނި ގޮތުގައި ހިންދު ދަތުރުކުރަމުން ދިޔައީ އާއިލާއާ އެކު ކަމަށާއި އޭގެ ތެރޭގައި އޭނާގެ 15 އަހަރުގެ އެއްބަނޑު އެއްބަފާ ކޮއްކޮ ލަޔާން ވެސް ހިމެނޭ ކަމަށެވެ.
މި ފިލްމަކީ ފަލަސްތީނުގެ ރެޑް ކްރެސެންޓް ސޮސައިޓީއަށް ހިންދު އެންމެ ފަހުން ކުރި ފޯނު ކޯލްގެ ހަގީގީ އޯޑިއޯ ރެކޯޑިން އަށް ބިނާކޮށް އުފައްދާފައިވާ ފިލްމެކެވެ.
ހިންދުގެ މުޅި އާއިލާ ޝަހީދު ކޮށްލުމުގެ އިތުރަށް، ހިންދު ގުޅުމުން އެހީތެރިވާން އައި ދެ ޕެރަމެޑިކުން ތިބި އެމްބިއުކާންސަށް ވެސް ބަޑި ޖަހައި ޒައެނިސްޓުން ވަނީ އެ ދެމީހުން ވެސް ޝަހީދު ކޮށްލާފައެވެ.
އެކަން އިސްރާއީލު ސިފައިން ވަނީ ދޮގުކޮށްފައެވެ. ނަމަވެސް ފަހުން ލަންޑަންގެ ރިސާޗް ގްރޫޕް ފޮރެންސިކް އާކިޓެކްޗާ އިން ކުރި ތަހުގީގަކުން އެނގުނީ ހިންދު ރަޖަބް އިން ކާރަށް އިސްރާއީލު ސިފައިން ވަނީ ސަތޭކަ އަށް ވުރެ ގިނަ ފަހަރަށް ބަޑިން ޙަމަލާދީފައި ކަމެވެ.
ސެޕްޓެމްބަރު 2025 ގައި ވެނިސް އިންޓަނޭޝަނަލް ފިލްމް ފެސްޓިވަލްގައި ޕްރިމިއާ ކުރި މި ފިލްމަށް ވަނީ ދުނިޔޭގެ ސަމާލުކަން ލިބިފައެވެ.
