ދިވެހި ޙައްޖާޖީން މީގެ ކުރިން މައްކާއިން މަދީނާއަށް ކުރި 8-10 ގަޑިއިރުގެ ދިގު ދަތުރު ރައީސް މުޢިއްޒު މިވަނީ 2 ގަޑިއިރުން ދެވޭ ގޮތަށް ހަމަޖައްސައިދެއްވާފަ: އެމްޑީ ޝަކީލް
މައްކާ ރޫޓު އިނީޝިއޭޓިވްގެ ދަށުން ދިވެހިރާއްޖެއިން ޙައްޖުގެ މަތިވެރި އަޅުކަމަށް ސަޢުދީ ޢަރަބިއްޔާއަށް ދިޔަ ދިވެހި ޙައްޖުވެރިންނަށް ސަޢުދީ ޢަރަބިއްޔާގެ ސަރުކާރުން ހޫނު މަރުހަބާއެއް ކިޔައިފިއެވެ.
މިއަދު ރާއްޖޭގައި ރަސްމީކޮށް އިފްތިތާޙްކުރި މައްކާ ރޫޓު އިނީޝިއޭޓިވްގެ ދަށުން ޙައްޖުވެރިން ރާއްޖެއިން ފުރުމުގެ ކުރިން ސަޢުދީ ޢަރަބިއްޔާގެ އިމިގްރޭޝަންގެ ހުރިހާ ކަމެއް ފުރިހަމަކުރެވިފައިވާއިރު، ޙައްޖުވެރިން ޖިއްދާ އެއާޕޯޓުގައި މަޑުނުކޮށް ސީދާ ހޮޓަލަށް ދެވޭނެ އިންތިޒާމް ވެސް ހަމަޖެހުނުއިރު އެންމެ ޚާއްޞަ ކަމަކީ މިފަހަރު ދިވެހި ޙައްޖާޖީންނަށް މައްކާއިން މަދީނާއަށް އެންމެ ދެގަޑިއިެުތެރޭގައި ދެވޭނެއެވެ. މީގެ ކުރިން ޙައްޖާޖީންނަށް މައްކާއިން މަދީނާއަށް ދަތުރުކުރާނަމަ 8 ގަޑިއިރާއި 10 ގަޑިއިރު ހޭދަވެއެވެ.
މިކަން ފާހަގަ ކުރައްވަމުން ޙައްޖު ކޯޕަރޭޝަންގެ މެނޭޖިންގ ޑައިރެކްޓަރ މުޙައްމަދު ޝަކީލް ވިދާޅުވީ މިއީ ދިވެހި ޙައްޖާޖީންނަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ހޯއްދަވައިދެއްވި ވަރަށް ބޮޑު ލުޔެކެވެ. އަދި ފަސޭހައެކެވެ.
ޙައްޖުވެރިން މައްކާއަށް ވަޑައިގެންނެވުމުން ކޮންމެ ބޭފުޅަކަސް މަރުޙަބާ ދެންނެވުމުގެ ގޮތުން މަލެއް ދެއްވިއިރު އެއާޕޯޓުގައި މަދުކުރުމެއްނެތި ސީދާ ދިޔައީ ހޮޓަލަށްކަން ފާހަގަ ކުރެވެއެވެ.
