ކުއްލި ޚަބަރު: ގްރީންލޭންޑަށް އަރައިގަންނަން އެމެރިކާއިން އިނގިރޭސީވިލާތުގައި އެހީ އަށް އެދުމުން އިނގިރޭސީން އެކަމާއި ދެކޮޅު ހަދައި، ޖަރުމަނާއި ފުރާންސުގެ ވެރިންނާއި ބައްދަލުކޮށް ގްރީންލޭންޑު ޙިމާޔަތް ކުރުމަށް މަޝްވަރާ ފަށައިފިއެވެ.
އިނގިރޭސީން މި ފިޔަވަޅު އަޅާފައި ވަނީ، ބަޔަކު ރުހުނަސް ނުރުހުނަސް އެމެރިކާއިން ގްރީންލޭންޑުގެ ކޮންޓްރޯލް ނަގާނެ ކަމަށް ބުނެފައިވާ ދަނޑިވަޅެއްގައެވެ. އަނެއްކޮޅުން ފުރާންސުން ވެސް ވަނީ ނޭޓޯގެ އެހީތެރިކަން ގްރީންލޭންޑަށް ބޭނުންވެއްޖެ ޙާލަތެއްގައި އެ މަސައްކަތް ކުރާނެ ކަމަށެވެ. ސަބަބަކީ ގްރީންލޭންޑަކީ ނޭޓޯގެ މެންބަރު ޑެންމާކުން ހިންގާ ރަށެކެވެ. ގްރީންލޭންޑަކީ ދުނިޔޭގައިވާ އެންމެ ބޮޑު ރަށެވެ.
މީގެ އިތުރުން އިއްޔެ ރައީސް ޑޮނަލްޑް ޓްރަމްޕް ވިދާޅުވެފައިވާ ގޮތުގައި ވޮޝިންޓަނުން ފިޔަވަޅެއް ނާޅައިފިނަމަ ގްރީންލޭންޑް ރަޝިޔާގެ ނުވަތަ ޗައިނާގެ ކޮންޓްރޯލްގެ ދަށަށް ވެއްޓިދާނެއެވެ. ޓްރަމްޕް މިހެން ވިދާޅުވީ، ވައިޓް ހައުސްގައި ތެލާއި ގޭސް އުފައްދާ ކުންފުނިތަކުގެ އިސް ވެރިންނާއި ބައްދަލުކުރައްވައި ވާހަކަ ދައްކަވަމުންނެވެ.
“އަހަރެމެން މިއުޅެނީ ގްރީންލޭންޑަށް ކަމެއް ކުރަން، އެމީހުންނަށް ކަމުދިޔަޔަސް ނުދިޔަޔަސް،” ޓްރަމްޕް ވިދާޅުވިއެވެ.
ޓްރަމްޕް ވިދާޅުވީ އޭނާ އަކީ “ޑެންމާކުގެ ފޭނެއް” ކަމަށާއި ނަމަވެސް ގްރީންލޭންޑުގެ ސަރުކާރާ އެކު “ޑީލް ހަދަން ބޭނުންވާ” ކަމަށް ފާހަގަކުރެއްވިއެވެ. ރީތި ގޮތުގައި ވިޔަސް ނުވަތަ ހުތުރު ގޮތުގައި ވިޔަސް އެކަން ކުރަން ޖެހޭ ކަމަށް ޓްރަމްޕް ވިދާޅުވިއެވެ.
ޖެނުއަރީ މަހުގެ ތިން ވަނަ ދުވަހު ވެނެޒުއެލާގައި ރައީސް ނިކޮލަސް މަޑޫރޯ އަތުލައިގަތް އަސްކަރީ އޮޕަރޭޝަނަށް ފަހު، އެމެރިކާގެ ރައީސް ވަނީ އެމެރިކާގެ ސަލާމަތަށްޓަކައި، އެމެރިކާގެ ދަށަށް ގްރީންލޭންޑް ގެންނަން ބޭނުންވާކަން ތަކުރާރުކޮށްފައެވެ.
ގްރީންލޭންޑުގައި ނޭޓޯގެ ސިފައިން އިތުރުކުރުމަށް ޖަރުމަނުވިލާތުގެ ޗާންސެލަރ އޯލަފް ޝޯލްޒް މިދިޔަ އަހަރު ގޮވައިލެއްވިކަން ވެސް ފާހަގަ ކުރެވެއެވެ. އޭނާ އެގޮތަށް ގޮވައިލެއްވީ އެމެރިކާގެ ރައީސް ޑޮނަލްޑް ޓްރަމްޕް ގްރީންލޭންޑް ގަތުމަށް 2019 ވަނަ އަހަރު ހުށަހެޅުއްވި ހުށަހެޅުމާއި ދެކޮޅަށް ފިޔަވަޅު އެޅުމުގެ ގޮތުންނެވެ. އޭރު ޑެންމާކުން ވަނީ ގްރީންލޭންޑަކީ ވިއްކާ ތަނެއް ނޫން ކަމަށް ބުނެ ދެކޮޅު ހަދާފައެވެ.
އަދި ހުސްވި ހަފްތާގައި ޑެންމާކުން ބުނެފައިވަނީ ގްރީންލޭންޑު އަތުލަން ބަޔަކު އުޅޭ ނަމަ އެ ބަޔަކާއި ދެކޮޅަށް ޙަމަލާ ދޭނެ ކަމަށެވެ. އެ ބަޔަކާއި އެކު ވާހަކަ ދައްކާނީ ވެސް އޭގެ ފަހުން ކަމަށް ޑެންމާކުން އިންޒާރު ދިނެވެ. މިއީ ޑެންމާކުން އެމެރިކާ އަށް ދިން ނުސީދާ އިންޒާރެކެވެ.
މޫސުމަށް އަންނަ ބަދަލުތަކާއި ގަނޑުފެން ވިރިގެން ދިއުމުގެ ސަބަބުން ގްރީންލޭންޑުގެ ސަރަހައްދުގެ ސަލާމަތާއި ގުޅޭ ގޮތުން ކަންބޮޑުވުންތަކެއް އުފެދިފައިވާކަން ވެސް ފާހަގަ ކުރެވެއެވެ.
