އިސްރާއީލުގެ ރަހުމްކުޑަ ހަމަލާތަކުގެ ސަބަބުން ސުންނާފަތިވެފައިވާ ޣައްޒާގެ ބިމުގައި، ޚިދުމަތް ޖަމިޢްޔާގެ ފަރާތުން ވަގުތީ މިސްކިތެއް ބިނާކޮށްފިއެވެ. މިއީ ދިވެހި ލޮބުވެތި ރައްޔިތުންގެ ދީލަތި އެހީގައި ބިނާކުރެވުނު މިސްކިތެކެވެ. މި މިސްކިތުގެ ޢަމަލީ މަސައްކަތް ނިމި މިސްކިތުގައި ރޭގައި ވަނީ ނަމާދުކުރަން ފަށައިފައެވެ. މިއީ ޚިދުމަތް ޖަމިޢްޔާގެ ފަރާތުން ޣައްޒާގައި ބިނާކުރި 7 ވަނަ ވަގުތީ މިސްކިތެވެ.
މި މިސްކިތް އެޅުމުގެ ބޭނުމަކީ އެ ސަރަހައްދުގައި ދިރިއުޅޭ މުސްލިމް އަޚުންނާއި އުޚުތުންނަށް ޖަމާއަތުގައި ނަމާދުކުރުމުގެ ފުރުސަތު ފަހިކޮށްދިނުމެވެ. ނަމާދު ކުރުމުގެ އިތުރުން، މިސްކިތުގައި ކުޑަކުދިންނަށް ޤުރުއާން ކިޔަވައިދިނުމުގެ މަސައްކަތްތައް ވެސް ކުރިއަށް ދާނެ ކަމަށް އެ ޖަމިޢްޔާއިން މައުލޫމާތު ދެއެވެ.
ޚިދުމަތް ޖަމިއްޔާގެ ޓީމުން ޣައްޒާގައި ކުރަމުންދާ މަސައްކަތްތަކަކީ ނުހަނު ބުރަ އަދި ނުރައްކާތެރި މާހައުލެއްގައި ކުރަމުންދާ މަސައްކަތްތަކެކެވެ. އެހެންނަމަވެސް، އެ ޓީމުން ދަނީ ކޮންމެ ދުވަހަކުވެސް ވަރަށް ހިތްވަރާއެކު މި އިންސާނީ ޚިދުމަތުގައި ދެމިތިބެ، ދިވެހިންގެ އެހީތެރިކަން ފަލަސްތީނުގެ ރައްޔިތުންނަށް ފޯރުކޮށްދެމުންނެވެ.
މި ޖަމިޢްޔާގެ މަސައްކަތްތަކަކީ ވަރަށް ހާމަކަން ބޮޑު ގޮތެއްގައި ކުރަމުންދާ މަސައްކަތްތަކެކެވެ. މިގޮތުން، އެ ޖަމިއްޔާގެ ފޭސްބުކް، އިންސްޓަގްރާމް، އަދި ޓިކްޓޮކް ފަދަ ސޯޝަލް މީޑިއާގެ ހުރިހާ މަންސަތަކުން މި މަސައްކަތްތަކުގެ އަޕްޑޭޓްތައް ދުވަހުން ދުވަހަށް އާންމުންނަށް ލިބެމުންދާނެއެވެ. މިއީ ދިވެހި ރައްޔިތުން ފަލަސްތީނުގެ ރައްޔިތުންނާ މެދު ބާއްވާ ގާތްކަމާއި، އިސްލާމީ އުޚުއްވަތްތެރިކަން ދައްކުވައިދޭ މަތިވެރި ނަމޫނާއެކެވެ.
އިތުރު ފޮޓޯތައް ތިރީގައި މިވަނީއެވެ.
