އިސްރާއީލުގެ ބޮޑުވަޒީރު ނަތަންޔާހޫގެ ޕްރެޝަރާއި އެކު އެމެރިކާއިން އީރާނާއި ދެކޮޅަށް ހަނގުރާމަ އެއް ފެށުމުގެ ނުރައްކާ ކުރިމަތިވެފައިވާއިރު، ޚޮރްމުޒް ކަނޑުއޮޅީގެ އެންމެ އަޑިއާއި ޖެހެންދެން ފުރިހަމަ ކޮންޓްރޯލް ހޯދާފައިވާ ކަމަށް އީރާނުން ބުނެފިއެވެ.
އީރާނުން ބުނީ އެ ޤައުމު ވަށައިގެންވާ ސަރަޙައްދުގެ އެއްގަމާއި، ކަނޑާއި އަދި ކިއެއްތަ، ކަނޑު އަޑީގެ ވަކިވަކި ގާތަކަށް ދަންދެން މިހާރު އޮތީ ކޮންޓްރޯލްގެ ދަށުގައި ކަމަށާއި، އެއިން އެއްވެސް ތަނަކުން ދުޝްމަނުންގެ ޙަމަލާއެއް އަތުވެފާނެތީވެ ޖެހިލުމެއް ނުވާ ކަމަށެވެ.
އީރާނުން މިހާރު ވަނީ ކަނޑުއަޑިއަށް ޑްރޯންތަކާއި ޖީޕީއެސްތަކާއި ކަނޑުއަޑީގައި ބޭނުންކުރާ ރާޑަރު ސިސްޓަމްތަކާއި، އަޑު ދެނެގަނެވޭނެ އާލާތްތަކާއި އެކި ވައްތަރުވައްތަރުގެ ކެމެރާތަކާއި ރޮބޮޓުތައް ފޮނުވާފައެވެ. މީގެއިތުރުން ސަބްމެރީންތައް ވެސް ދަނީ ޙަރަކާތްތެރިވަމުންނެވެ.
“އަޅުގަމޑުމެންނެއް ނޫޅޭން ހަނގުރާމައަކަށް ދާކަށެއް… ނަމަވެސް ފުރިހަމައަށް ތައްޔާރުވެފައި މި އޮތީ،” އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރުޖީސީ)ގެ ކޮމާންޑަރެއް ކަމަށްވާ މުޙައްމަދު އަކްބަރުޒާދޭ އާއި ޙަވާލާދީ ތުރްކިޔޭގެ ޓީވީ ޗެނަލުން ބުންޏެވެ.
އޭނާ ވިދާޅުވީ، ހަނގުރާމައެއް ހިނގައިފިނަމަ، އެންމެ މިލިމީޓަރެއް ވެސް ފަހަތަށް ނުޖެހޭނެ ކަމަށާއި އަދި އީރާނުން ދާނީ ކުރިއަށެވެ.
ޚޮރްމޫޒް ކަނޑުއޮޅި އަކީ ދުނިޔޭގެ ތެޔޮ ޝިޕްމަންޓްގެ ތިންބައިކުޅަ އެއްބައެވެ. މިތަން މެދުވެރިކޮށް ދުވާލަކު 20 މިލިއަން ފީފާގެ ތެޔޮ އުފުލައެވެ.
އެމެރިކާ އަށް ތެޔޮ ސަޕްލައި ކުރާ ޣިރާޤުގެ %85 ތެޔޮ އުފުލަނީ މި ކަނޑުއޮޅިންނެވެ. ސަޢޫދީ ތެލުގެ %35 އަދި ޔުނައިޓެޑް ޢަރަބް އެމިރޭޓްސް ގެ %20 އުފުލަނީ މި މަގުންނެވެ. މި ސަބަބާއި ހުރެ ޣިރާޤާއި ސަޢޫދީ އަދި ޢަރަބި ޢިމާރާތުން ބުނީ އީރާނަށް ޙަމަލާ ދިނުމަށް އެ ޤައުމުތަކުގެ ވަޔާއި ކަނޑާއި އެއްގަމެއް ނުލިބޭނެ ކަމަށެވެ. ސަބަބަކީ އީރާނަށް ޙަމަލާ ދިނުމަށް ދުޝްމަނުން އެހީތެރި ވެއްޖެ ނަމަ
އީރާނުން އެ ޤައުމުތަކަށް ޙަމަލާ ދޭނެ ކަމަށް ބުނެ އިންޒާރު ދީފައިވާތީއެވެ،
