ރާއްޖެއަށް ދަތުރުކުރުމުގައި ސަމާލުވުމަށް
މި އިންޒާރުތަކުގައި ޓެރަރިޒަމްގެ ނުރައްކާ، ރާއްޖޭގައި ކުރަމުންދާ މުޒާހަރާ އަދި ކުށްކުރުން ފަދަ ކަންކަމާ ގުޅިގެން ރާއްޖެއަށް ދަތުރުކުރާއިރު ސަމާލުވުމަށް އެ ޤައުމުތަކުގެ ރައްޔިތުންނަށް އިރުޝާދު ދީފައިވެއެވެ. ރާއްޖޭގެ ފަރާތުން މިފަދަ އިންޒާރުތަކެއް ނެތްކަމަށް ބުނެފައިވީ ނަމަވެސް، މި އިންޒާރުތައް އަދިވެސް ދެމިހުރިކަން ފާހަގަކުރެވެއެވެ. ސިންގަޕޫރުން ރާއްޖެއަށް ދަތުރު ނުކުރުމަށް އަންގާފައިވާ ކަމަށް ބުނެ ފަތުރައިގެން އުޅެނީ ސީދާ ކަނޑައެޅިގެން ދޮގެކެވެ.
އެމެރިކާ، އޮސްޓްރޭލިއާ، އިނގިރޭސިވިލާތް އަދި ކެނެޑާއިން ވަނީ ރާއްޖެއަށް ދަތުރުކުރުމާ ގުޅޭ ގޮތުން އިންޒާރުތަކެއް މިވަގުތު ދީފައެވެ. އެމެރިކާގެ ސްޓޭޓް ޑިޕާޓްމަންޓުން ވަނީ ރާއްޖެއަށް ދަތުރުކުރާއިރު އިތުރު ސަމާލުކަމެއް ދިނުމަށް އެދި ލެވެލް 2 ގެ އިންޒާރެއް ދީފައެވެ.
މީގެ އިތުރުން އޮސްޓްރޭލިއާ ސަރުކާރުން ވަނީ އާންމު ހަމަނުޖެހުންތަކާއި ޓެރަރިޒަމްގެ ނުރައްކަލާ ގުޅިގެން ރާއްޖެއަށް ދަތުރުކުރާއިރު ވަރަށް ބޮޑަށް ސަމާލުވުމަށް އިރުޝާދު ދީފައެވެ.
އިނގިރޭސިވިލާތުގެ ފޮރިން، ކޮމަންވެލްތް އެންޑް ޑިވެލޮޕްމަންޓް އޮފީހުން (އެފްސީޑީއޯ) ވެސް ވަނީ ރާއްޖެއަށް ދަތުރުކުރާއިރު ސަމާލުވުމަށް އިރުޝާދު ދީފައެވެ.
ހަމައެހެންމެ ކެނެޑާ ސަރުކާރުން ވަނީ ޓެރަރިޒަމްގެ ނުރައްކަލާ ގުޅިގެން ރާއްޖެއަށް ދަތުރުކުރާއިރު ވަރަށް ބޮޑަށް ސަމާލުވުމަށް އިރުޝާދު ދީފައެވެ.
މި އިންޒާރުތަކުގައި ފާހަގަކޮށްފައިވާ ގޮތުގައި ޓެރަރިސްޓް ޖަމާޢަތްތަކުން ފަތުރުވެރިންގެ މަންޒިލުތަކާއި، ދަތުރުފަތުރުގެ މަރުކަޒުތަކާއި، މާރުކޭޓުތަކާއި، ޝޮޕިންގ ސެންޓަރު އަދި ސަރުކާރުގެ އިދާރާތައް އަމާޒުކޮށްފާނެ ކަމަށް ފާހަގަކޮށްފައި ވެއެވެ. އަދި މިފަދަ ހަމަލާތައް ދުރު ރަށްރަށުގައި ހިނގައިފިނަމަ އެކަމަށް އިޖާބަދިނުމަށް ގިނަ ވަގުތު ނަގާފާނެ ކަމަށްވެސް ފާހަގަކޮށްފައިވެއެވެ.
ރާއްޖޭގެ ފަރާތުން ބައެއް އޭޖެންސީން މިފަދަ އިންޒާރުތަކެއް ނެތްކަމަށް ބުނެފައިވީ ނަމަވެސް، މަތީގައި ބަޔާންކުރެވުނު ޤައުމުތަކުން އަދިވެސް އޮތީ ޓްރެވެލް އެޑްވައިޒަރީ ނެރެފަ އެވެ.
