ވެމްކޯގެ މުވައްޒަފުންގެ ޕެންޝަން ފައިސާ ޖަމާނުކޮށް 8 މަސް ދުވަސް ވެފައިވާ ކަމަށް ބުނެ ސޯޝަލް މީޑިއާގައި ދައުރުވަނީ ހަގީގަތާ ޚިލާފު ވާހަކަތަކެއް ކަމަށް އެ ކުންފުނިން ބުނެފިއެވެ.
ވެމްކޯ އިން ނެރުނު ބަޔާނެއްގައި ބުނީ މިއަދާ ހަމައަށް ވެސް އެ ކުންފުނިން އަންނަނީ މުވައްޒަފުންގެ ޕެންޝަން ފައިސާ ދައްކަމުން ކަމަށާއި ޕެންޝަން އޮފީހާއި އެ ކުންފުންޏާއި ދެމެދު ވާހަކަ ދެކެވި، ޖެހިފައިވާ މައްސަލަ ހައްލުކުރުމުގެ މަސައްކަތް ކުރަމުންދާ ކަަމަށެވެ.
ވެމްކޯގެ މާލީ ހާލަތަށް ބަލާއިރު، ކުންފުނީގެ ހަރަދުތަކާއި މުވައްޒަފުންގެ މުސާރަ ހަމަޖައްސަމުންދަނީ ކުންފުންޏަށް ލިބޭ އާމްދަނީއަކުން ވެފައި، ކުންފުންޏަށް އާމްދަނީގެ ގޮތުގައި ލިބެންޖެހޭ ފައިސާ ގިނަ ތަންތަނުން ނުލިބޭ ކަމާއި، އެގޮތުން މާލޭ ސިޓީ ކައުންސިލުން މިހާރުވެސް ދައްކަން ޖެހި ނުދައްކާ 66 މިލިއަނެއްހާ ރުފިޔާ އޮތް ކަމަށް ވެމްކޯ އިން ބުނެއެވެ.
އަދި މިވަގުތު މުވައްޒަފުންގެ މުސާރަ އާއި ޕެންޝަން ފައިސާގެ ކަންކަމާ ގުޅިގެން ޕެންޝަން އޮފީހާ ވާހަކަ ދައްކައިގެން ފަސޭހަ އިންތިޒާމަކުން ފައިސާ ހަލާސްކުރެވޭނެ ގޮތަކަށް ދެފަރާތުން އެއްބަސްވެވިފައިވާ ކަމަށް ވެމްކޯ އިން ބުންޏެވެ. އެގޮތުން އެއްވެސް މުވައްޒަފެއްގެ ޕެންޝަން ހައްގަށް އުނިކަމެއް ނާންނާނެހެން ފައިސާ ދެއްކުން ރޭވިފައިވާ ކަމަށްވެސް އެ ކުންފުނިން ބުންޏެވެ.
ވެމްކޯއިން ވަނީ މުވައްޒަފުންނަށް އޮޅޭނެހެން އަދި މުވަޒަފުންގެ ހިތުގައި ނަފްރަތާއި ރުޅިވެރިކަން އުފެދޭނެ ގޮތަށް މައުލޫމާތު ފަތުރަމުންދާތީ އެކަން ކުށްވެރިކޮށް، އެކަން އެގޮތަށް ނުކުރުމަށް އިލްތިމާސްކޮށްފައެވެ.
