ރާއްޖެއިން ސީޝެލްސްއަށް ކަނޑައެޅުއްވި އައު ސަފީރު މަސްޢޫދު އިމާދު، އެޤައުމުގެ ރައީސް ޑރ. ޕެޓްރިކް ހަރމިނީއަށް ސަފީރުކަމުގެ ފަތްކޮޅު އަރުވައިފިއެވެ.ސީޝެލްސްގެ ވެރިރަށް ވިކްޓޯރިއާގައި ހުންނަ ރިޔާސީ ގަނޑުވަރުގައި ބޭއްވި ޚާއްޞަ ރަސްމިއްޔާތެއްގައި، ސަފީރު މަސްޢޫދު ވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ފަރާތްޕުޅުން އެޤައުމުގެ ރައީސަށާއި ރައްޔިތުންނަށް ހެޔޮއެދުންތަކާއި ތަހުނިއްޔާ އަރިސްކުރައްވާފައެވެ.
ފަތްކޮޅު އެރުވުމުގެ ރަސްމިއްޔާތަށްފަހު ބޭއްވި ބައްދަލުވުމުގައި، ސީޝެލްސް ސަރުކާރުން ވިދާޅުވި ހޫނު މަރުޙަބާއަށް ސަފީރު ޝުކުރު އަދާކުރެއްވިއެވެ. އަދި ދެ ޤައުމުގެ ދެމެދުގައި އޮތް ޒަމާންވީ ގުޅުން އިތުރަށް ބަދަހިކުރުމަށް މަސައްކަތް ކުރައްވާނެ ކަމުގެ ޔަޤީންކަން ދެއްވިއެވެ.
ޚާއްޞަގޮތެއްގައި ދެ ޤައުމަށްވެސް މުހިންމު ދާއިރާތައް ކަމަށްވާ މަސްވެރިކަމާއި، ފަތުރުވެރިކަމުގެ އިތުރުން ވިޔަފާރީގެ ދާއިރާއިން ގުޅުން ބަދަހިކުރުމުގެ މުހިންމުކަމުގެ މައްޗަށް ސަފީރުގެ ވާހަކަފުޅުގައި އަލިއަޅުއްވާލެއްވިއެވެ.މި ބައްދަލުވުމުގައި ސީޝެލްސްގެ ރައީސް ޑރ. ޕެޓްރިކް ހަރމިނީ ވަނީ އައު ސަފީރަށް މަރުޙަބާ ވިދާޅުވެފައެވެ. އަދި ސަފީރު މަސްޢޫދުގެ ދައުރުގައި ދެ ޤައުމުގެ ދެމެދުގައި އޮތް ހަރުދަނާ ގުޅުން އައު އުސްމިންތަކަކަށް ވާޞިލްވާނެ ކަމަށް އުއްމީދު ކުރައްވާ ކަމަށް އެމަނިކުފާނު ވިދާޅުވިއެވެ.
ފަތްކޮޅު އެރުވުމުގެ ރަސްމިއްޔާތަށްފަހު، ސަފީރު މަސްޢޫދު އިމާދު ވަނީ އެޤައުމުގެ ނައިބު ރައީސް ސަބޭސްޓިއަސް ޕިއްލޭގެ އަރިހަށް އިޙްތިރާމުގެ ޒިޔާރަތެއް ކުރައްވާފައެވެ.މަސްޢޫދު އިމާދަކީ މިވަގުތު ސްރީލަންކާއަށް ރާއްޖެއިން ކަނޑައަޅުއްވާފައި ހުންނަވާ ހައިކޮމިޝަނަރެވެ.
ދިވެހި ޚާރިޖިއްޔާއިން މަޢުލޫމާތު ދެއްވާގޮތުގައި، ސީޝެލްސްގެ ސަފީރުކަމުގެ މަސްއޫލިއްޔަތުތައް މަސްޢޫދު އަދާކުރައްވާނީ ލަންކާގައި ހުންނަވައިގެންނެވެ.
