މިދިޔަ އަހަރުގެ މަސްވެރިންގެ ދުވަސް ކަމަށްވާ ޑިސެމްބަރު 10 ވަނަ ދުވަހުން ފެށިގެން މިއަދާ ހަމައަށް މަސްވެރިންގެ އަތުން ގަނެފައިވާ މަހުގެ އަގުގެ ގޮތުގައި 470 މިލިއަން ރުފިޔާ މަސްވެރިންނަށް ދޫކޮށްފައިވާ ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް ކުރިއަށް ގެންދަވާ ޕޮޑްކާސްޓުގައި އެމަނިކުފާނު ވަނީ މިދައުރުގެ ނިމިދިޔަ ދުވަސްތަކުގައި މަސްވެރިންނަށް ފައިސާ ލިބޭނޭ ދެމެހެއްޓެނިވި އިންތިޒާމެއް ހަމަޖެއްސުމަށް ކުރެއްވި މަސައްކަތްތަކާ ގުޅޭގޮތުން މިއަދު ވާހަކަދައްކަވާފަ އެވެ.
ރައީސް ވިދާޅުވީ އެމަނިކުފާނުގެ ވައުދުވީ ގޮތަށް، 48 ގަޑިއިރު ތެރޭ ފައިސާ ދެވޭ ގޮތަށް ހަމަޖައްސާފައިވާ އިންތިޒާމުގެ ނަތީޖާއެއްގެ ގޮތުން، ކުރީގައި ދޯނިން ފޭބި ޒުވާނުން އަލުން މަސްވެރިކަމާ ގުޅިފައިވާ ކަމަށެވެ. ގަވާއިދުން ފައިސާ ލިބޭނޭ ކަމުގެ އިތުބާރު ޒުވާނުންނަށް ލިބުމުން، ދިވެހި މަސްދޯނިތަކުގައި މަސައްކަތްކުރަނީ ދިވެހިން ކަމުގައި ހެދުމަށް ކަނޑައަޅުއްވާފައިވާ އަމާޒަށް ވާސިލްވުމުގެ މަގުވެސް ތަނަވަސްވެގެން ދާނެ ކަމުގައި ވިދާޅުވި އެވެ.
”މިދިޔަ އަހަރުގެ މަސްވެރިންގެ ދުވަހުން ފެށިގެން މިއަދާ ހަމައަށް އެންމެ ދުވަހެއްވެސް ވައްޓާނުލައި މަސްވެރިންނަށް ފައިސާ ދެވެމުން އެބަދޭ. މިމުއްދަތުގެ ތެރޭގައި 470 މިލިއަން ރުފިޔާ މަސްވެރިންނަށް ދޫކުރެވިއްޖެ،” އެމަނިކުފާނު ވިދާޅުވި އެވެ. މަސްވެރިންނަށް މާލީ ބާރުވެރިކަން ކަށަވަރުކޮށްދިނުމަށްޓަކައި އެކުލަވާލި މަސްވެރިންގެ ދަފުތަރުގައި މަސްވެރި ދޯނިތަކުގެ 95 އިންސައްތަ މިހާތަނަށް ދަފުތަރުވެފައިވާ ކަމަށްވެސް ރައީސް މިއަދު ވަނީ ހާމަކުރައްވާފަ އެވެ. އަދި ވަކިވަކި މަސްވެރިން ދަފުތަރު ކުރެވެމުންދިއުމުން، މަސްވެރިކަމަކީ ދެމެހެއްޓެނިވި އާމްދަނީ ލިބޭ ކަމެއްގެ ގޮތުގައި ބޭންކުތަކުން ބަލައިގަންނާނެ ކަންވެސް ފާހަގަކުރެެއްވި އެވެ.
މަސްވެރިކަމަށް ބޭނުންވާ ކަނދުފައްޗަށް އިޝާރާތްކުރައްވަމުން ރައީސް ވިދާޅުވީ މި ދައުރުގެ މިހާތަނަށް 18 ވަދު ކަނދުފަތި ގާއިމުކުރެވިފައިވާ ކަމަށާއި، ކަނޑައިގެންދިޔަ 21 ކަނދުފަތިވެސް އަލުން ގާއިމުކުރެވިފައިވާ ކަމަށެވެ. އަދި މަސްވެރިންގެ ރައްކާތެރިކަމަށްޓަކައި ރެސްކިއު ޑައިވިން ކޯސްތައް ހިންގައި، 56 ދޯންޏަކުން 56 ރެސްކިއު ޑައިވަރުން ތަމްރީން ކުރެވިފައިވާ ކަމަށް ވިދާޅުވި އެވެ.
މަސްވެރިކަމުގެ ދާއިރާއިން މީހުން ބިނާކުރުމުގެ ގޮތުން ގައުމީ ޔުނިވަސިޓީގެ މޯލްޑިވްސް ކޮލެޖް ފޯ ފިޝަރީޒް އެންޑް އޯޝަން ސައިންސަސް އިން 45 ދަރިވަރަކަށް ބެޗެލާސް އޮފް ފިޝަރީޒް މެނޭޖްމަންޓް ކިޔެވުމަށް ފުލް ސްކޮލާޝިޕްގެ ފުރުސަތު ދެމުންދާ ކަމަށްވެސް ރައީސް ވިދާޅުވި އެވެ. އަދި މަސްވެރިކަމާ ގުޅުންހުރި އެހެނިހެން ދާއިރާތަކުންވެސް ތައުލީމާއި ތަމްރީނުގެ ފުރުސަތުތައް ފަހިކޮށްދެއްވާނޭ ކަމުގައި ވިދާޅުވި އެވެ.
