ދުނިޔޭގެ ޞިއްޙަތު ބައްޓަންކުރާ، މުޅި މި ދުނިޔޭގެ އެންމެ ނުފޫޒުގަދަ 100 ބޭފުޅުންގެ (ޓައިމް100 ހެލްތު) ލިސްޓުގައި ހިމެނިވަޑައިގެންނެވި އޭޝިއާގެ ބައްރުގެ މިހާރުގެ ރައީސުންގެ ތެރެއިން ފުރަތަމަ ރައީސްގެ ޝަރަފް ރާއްޖޭގެ ރައީސް ޑރ. މުޙައްމަދު މުޢިއްޒަށް ލިބިވަޑައިގެންފިއެވެ.
ރާއްޖޭގެ ރައީސް ޑރ. މުޢިއްޒަށް މި ޝަރަފް ލިބެން ޖެހޭ ކަމަށް އދ. ހިމެނޭހެން ދުނިޔޭގެ 40,000 އަށް ވުރެ ގިނަ ޖަމްޢިއްޔާ އާއި ޖަމާޢަތްތަކުން އެއްބަސް ވެއެވެ.
ޖެނުއަރީ 2007 ގެ ފަހުން އުފަންވާ މީހުންނަށް ދުންފަތުގެ އިސްތިޢުމާލުކުރުން މަނާކޮށް، ދުންފަތުގެ އިސްތިޢުމާލު ނުކުރާ މުޅި ދުނިޔޭގެ ވެސް ފުރަތަމަ ޖީލު އުފައްދަން މަސައްކަތް ކުރަނީ ދިވެހިރާއްޖެ އިން ކަމަށް ވެފައި، މުޅި ދުނިޔޭގައި ވެް ވޭޕާއި ސިނގިރޭޓަށް އެންމެ ހަރުކަށި ފިޔަވަޅެއް އެޅުއްވީ ވެސް ރައީސް ޑރ. މުޢިއްޒެވެ.
މީގެ އިތުރުން ދުނިޔޭގައި ފުރަތަމަ ފަހަރަށް ދުންފަތާއި ދުރަށް ދިޔުމަށް ބޭނުންވާ މީހުންނަށް 24 ގަޑިއިރުގެ ޞިއްޙީ ހެލްޕް ލައިނެއް ތަޢާރަފް ކުރެއްވުމާއި، މައިމީހާގެ ފުށުން ދަރިފުޅަށް އެޗްއައިވީ، ސިފިލިސް، އަދި ހެޕަޓައިޓިސް ބީ ފެތުރުން ނައްތާލުމުގައި ރައީސް ޑރ. މުޙައްމަދު މުޢިއްޒު ކުރައްވާ މަސައްކަތްޕުޅަށް އދ. އާއި ދުނިޔޭގެ އެންމެ ނުފޫޒު ގަދަ 5000-10,000 މީޑިއާ އޮގަނައިޒޭޝަންތަކުން ޤަބޫލު ކުރެއެވެ.
ރައީސް ޑރ. މުއިއްޒުގެ އިތުރުން ޓައިމް100 ހެލްތު ލިސްޓުގައި އެމެރިކާގެ ކުރީގެ ރައީސް ޖޯ ބައިޑަން ހިމެނިވަޑައިގަންނަވާކަން ފާހަގަ ކުރެވެއެވެ. ޖޯބައިޑަން ހިމެނިވަޑައިގަންނަވަނީ ކޮވިޑް19 ޕެންޑަމިކުގައި ކުރެއްވި މަސައްކަތްޕުޅުތަކުގެ ސަބަބުންނެވެ.
