އީރާނުގައި ބޮޑު ލޭއޮހޮރުވުމެއް ހިންގައި ޚާމަނާއީގެ ސަރުކާރު ވައްޓާލުމަށްޓަކައި ބޭރުގެ ޖާސޫސުންނާއި ގުޅިގެން އެތެރެކޮށްފައިވާ ގިނަ ޢަދަދެއްގެ ހަތިޔާރުތައް އީރާނުގެ އިންޓެލިޖެންސުން ހޯދައި، ސީއައިއޭ އާއި މޮސާޑުގެ ރޭވުން ފްލޮޕް ކޮށްލައިފި ކަމަށް އެ ޤައުމުން ބުނެފިއެވެ.
އިސްލާމިކް ރިޕަބްލިކްގެ ޖާސޫސީ އިދާރާއިން ބުނީ ހަތިޔާރުތައް ފެނުނީ ގެތަކުގައާއި ތަންގަނުގައި ރައްކާކޮށްފައި ހުއްޓާ ކަމަށާއި، އެތަކެއްޗަކީ އެމެރިކާގެ އުފެއްދުންތަކެއް ކަމަށެވެ. ނަމަވެސް މިކަމާއި ގުޅިގެން އެމެރިކާއިން ވަކި އެއްޗެއް އަދި ނުބުނެއެވެ. ފެނުނު ތަކެތީގެ ތެރޭގައި ބަޑިއާއި ފިސްތޯލަ އާއި ވަޒަނާއި އިމްޕްރޮވައިޒްޑް އެކްސްޕްލޮސިވް ޑިވައިސްސް (އައިއީޑީ) ފަދަ ތަކެތި ހިމެނެއެވެ.
އީރާނުގެ ފޮރިން މިނިސްޓަރު އައްބާސް އަރަޣްޖީ ހާމަކުރެއްވި ގޮތުގައި، އީރާނުގައި މުޒާހަރާތައް ކުރިޔަށް ގެންދަންވީ ގޮތުގެ ފޯންކޯލް ރިކޯޑިންތަކެއް ވެސް ވަނީ ހޯދާފައެވެ. އެ ރެކޯޑިން ތަކަކީ ބޭރުގެ ފަރާތްތަކުން ކޮށްފައިވާ ކޯލުތަކެކެވެ.
ފާހަގަކޮށްލަން ޖެހޭ ކަމަކީ އީރާނުން މި ހަތިޔާރުތައް އަތުލައިގަތްއިރު، އެމެރިކާގެ ރައީސް ޑޮނަލްޑް ޓްރަމްޕް ވަނީ މުޒާހަރާގެތެރޭގައި ޙަމަލާތައް ދޭން ފަށައިފި ނަމަ އެމެރިކާ އިން މުޒާހަރާގެ ތެރެއަށް ވަންނާނެ ކަމަށެވެ. އެހެންކަމުން އީރާނުން ސިފަ ކުރަނީ، އިންޓެލިޖެންސުން ހޯދާފައިވާ މި ހަތިޔާރުތަކަކީ އެމެރިކާގެ މި ދެންނެވި ޕްލޭނާއި ގުޅިފައިވާ ހަތިޔާރު ތަކެކެވެ.
އެމެރިކާ އިން މިހާރު ވަނީ އީރާނަށް އިތުރު ދަތިކުރުމުގެ ފިޔަވަޅުތަކެއް ވެސް އަޅާފައެވެ. އީރާނާއެކު ވިޔަފާރިކުރާ ކޮންމެ ގަޤަމަކުން 25 ޕަސެންޓްގެ ޓެރިފް ނަގާނެ ކަމަށް އެމެރިކާ އިން ވަނީ ބުނެފައެވެ.
އީރާނުގައި ކުރަމުންދާ މުޒާހަރާގައި މަރުވި މީހުންގެ އަދަދު މަދުވެގެން 646 މީހުންނަށް އަރާފައި ވެއެވެ.
