ވެނެޒުއެލާގެ ރައީސް ނިކޮލަސް މަދޫރޯ ހައްޔަރުކޮށްގެން ގެނެސް އެމެރިކާގެ ހައި ސެކިއުރިޓީ ޖަލަކަށް ލައި ބަންދު ކޮށްފައި ބެހެއްޓުމަށް ފަހު ވެނެޒުއެލާގެ ސަރުކާރަށް ދަތިކުރުމުގެ އިތުރު ފިޔަވަޅުތައް އަޅަން އެމެރިކާގެ ރައީސް ޑޮނަލްޑް ޓްރަމްޕް ކުރި މަސައްކަތް ސެނެޓުން ފެނަށް ދުއްވާލައިފިއެވެ. އެމެރިކާގެ ސެނެޓުން ޓްރަމްޕުގެ ޕްލޭން ފަނި ކޮށްލީ މި ޖެނުއަރީ މަހުގެ 8 ގައެވެ.
ޓްރަމްޕް މަސައްކަތް ކުރެއްވީ ވެނެޒުއެލާ އާއި ދެކޮޅަށް އިތުރު އަސްކަރީ ފިޔަވަޅުތައް އެޅުމަށެވެ. ނަމަވެސް ސެނެޓްގައި ތިއްބަވާ ޑިމޮކްރެޓުންގެ ހުރިހާ މެންބަރުންނާއި ޚުދު ޓްރަމްޕުގެ ރިޕަބްލިކަން ޕާޓީގެ ފަސް މެންބަރުން ވަނީ ޓްރަމްޕަށް ގޮންޖައްސަވައި، އެކަން އެގޮތަށް ނުކުރެވޭނެ ކަމަށް ބުނެ ޤަރާރެއް ނެރެ، ބައިނަލްއަޤްވާމީ މައިދާނުގައި ޓްރަމްޕު ލަދު ގަންނުވާލާފައެވެ.
މި ޤަރާރަކީ ބޮޑު ތަނުން ރަމްޒީ ޤަރާރަކަށް ވާއިރު، ރިޕަބްލިކަން ޕާޓީގެ ކޮންޓްރޯލް އޮންނަ ހައުސްގައި މި މައްސަލަ ހޫނު ވާނެ ކަމަށް ބެލެވޭއިރު، ރިޔާސީ ވީޓޯ ވެސް ކުރިމަތިވާނެ ކަމަށް ބެލެވެއެވެ.
ވެނެޒުއެލާގައި އަސްކަރީ ޙަރަކާތްތައް ހިންގުމަށް މީގެ ކުރިން ވެސް ޓްރަމްޕު ވަނީ ހަތަރު ފަހަރު މަތީން މަސައްކަތް ކޮށްފައެވެ. އެ ހުރިހާ ފަހަރަކު ޤާނޫނު ހަދާ މަޖިލީހުގެ މެމްބަރުން ވަނީ އެކަން ނާކާމިޔާބު ކޮށްލާފައެވެ.
