ރާއްޖޭގެ އެއާޕޯޓުތައް ހިންގުން ބޭރުގެ ޤައުމުތަކާއި ޙަވާލު ނުކުރާނެ ކަމަށް ދަތުރުފަތުރާއި މަދަނީ އުދުހުންތަކާ ބެހޭ ވަޒީރު މުޙައްމަދު އަމީން ވިދާޅުވެއްޖެއެވެ.
އިންޑިއާގެ އެގްޒިމް ބޭންކުގެ ލޯނު އެހީއާއެކު ޒަމާނީ ފެންވަރަށް ތަރައްޤީކޮށްފައިވާ ހަނިމާދޫ އިންޓަރނޭޝަނަލް އެއަރޕޯޓް ހިންގުމަށް އިންޑިއާގެ ކުންފުންޏަކަށް ދޭން އުޅޭ ކަމަށް ބުނެ އެ ގައުމުގެ ނޫސްތަކުގައި ދަނީ ހަބަރު ފަތުރަމުންނެވެ.
އިންޑިއާގެ “ދަ ހިންދޫ” އިން ރިޕޯޓް ކޮށްފައިވާ ގޮތުގައި ހަނިމާދޫ އެއާޕޯޓު ހުޅުވުމުގެ ރަސްމިއްޔާތަށް ފަހު އިންޑިއާގެ ސިވިލް އޭވިއޭޝަން މިނިސްޓަރުގެ އަރިހުގައި ހަނިމާދޫ އިންޓަރނޭޝަނަލް އެއަރޕޯޓުގެ ހިންގުމާ ހަވާލުވެދިނުމަށް ދިވެހި ސަރުކާރުން އެދިފައިވާ ކަމަށް ބުނެފައި ވެއެވެ.
މިނިސްޓަރު ވިދާޅުވީ އެއީ ހަގީގަތާ ހިލާފު ދޮގު ވާހަކަތަކެއްކަމަށް ކަމަށާއި، ދިވެހިރާއްޖޭގެ ބައިނަލްއަގުވާމީ އަދި ދާހިލީ ހުރިހާ އެއާޕޯޓުތަކެއް ހިންގާ ބަލަހައްޓަމުންދަނީ، މޯލްޑިވްސް ސިވިލް އެވިއޭޝަން އޮތޯރިޓީން ހުއްދަދީފައިވާ ދިވެހި އޮޕަރޭޓަރުންކަން މިނިސްޓަރު ފާހަގަކުރެއްވިއެވެ.
ހަނިމާދޫ އިންޓަނޭޝަނަލް އެއާޕޯޓު ރަސްމީކޮށް ހުޅުވާފައިވަނީ، މިދިޔަ އަހަރުގެ ނޮވެމްބަރ މަހުގެ 9 ވަނަ ދުވަހުއެވެ. ހަނިމާދޫ އިންޓަރނޭޝަނަލް އެއާޕޯޓުގެ އައު ޓަރމިނަލުން އޭ 320 އަދި ބޮއިންގ 737 މަރުކާގެ ފްލައިޓްތަކަށް ޚިދުމަތް ދެވޭނެއެވެ. އަދި އެއާޕޯޓުގައި އެއްފަހަރާ 9 ފްލައިޓް ޕާކުކޮށްފައި ބޭއްވޭނެ އޭޕްރަންއެއް ވަނީ ތަރައްޤީކޮށްފައެވެ. މި އޭޕްރަންގައި އެއްފަހަރާ އެއަރބަސްގެ 3 ބޯޓާއި، އޭޓީއާރުގެ 6 މަތިންދާ ބޯޓު ޕާކު ކުރެވޭނެއެވެ. މިއެއާޕޯޓުގެ ވަނީ، 2465 މީޓަރުގެ ދިގު ރަންވޭއަކާއި، އެއަރ ޓްރެފިކް ކޮންޓްރޯލް ޓަވަރަކާއެކު މުޅިން އައު ކާގޯ ޓާމިލަނެއް ތަރައްޤީކޮށްފައެވެ.
