މިއަންނަ އަހަރު މަސްޖިދުލް ޙަރާމްގެ އިމާމް އަދި ޚަޠީބު، ފަޟީލަތުއްޝައިޚް ޑރ. ޔާސިރު އައްދައުސަރީ ނުވަތަ މަސްޖިދުލް ޙަރާމްގެ އެހެން އިމާމެއް ރާއްޖެ ގެނައުމަށް މަސައްކަތްކުރައްވާނެ ކަމަށް އިސްލާމީ ކަންތައްތަކާބެހޭ ވަޒީރު، ޑރ. މުޙައްމަދު ޝަހީމް ޢަލީ ސަޢީދު ވިދާޅުވެއްޖެއެވެ.
ޑރ. ޝަހީމް ވިދާޅުވީ ކޮންމެ އަހަރަކު ޙަރަމްފުޅުގެ އިމާމެއް ރާއްޖެ ގެނައުމަށް މަސައްކަތްކުރައްވާނެ ކަމަށެވެ. މިކަން ކުރައްވަނީ ޒުވާން ޖީލަށް ހިތްވަރު ދެއްވުމުގެ ގޮތުން ކަމަށް އެމަނިކުފާނު ފޭސްބުކްގައި ކުރެއްވި ޕޯސްޓެއްގައި ފާހަގަކުރައްވާފައިވެއެވެ.
މިދިޔަ ހޯމަ ދުވަހު މަސްޖިދުއް ނަބަވީގެ އިމާމް އަދި ޚަޠީބު، ފަޟީލަތުއްޝައިޚް ޑރ. ޞަލާޙުލް ބުދައިރު ރާއްޖެ ވަޑައިގަތުމުން ޒުވާން ޙާފިޡުންނަށާއި، އިމާމުންނަށާއި ޢިލްމުވެރީންނަށް، އަދި އެންމެހާ ދިވެހި ރައްޔިތުންނަށްވެސް އުފާވެރިކަން ލިބިގެންދިޔަ ކަމަށް ވަޒީރު ވިދާޅުވިއެވެ. ޑރ. ބުދައިރު އިމާމްވެ ކުރެއްވި ނަމާދުތަކަށް މަސްޖިދު މަލިކި ސަލްމާން އަދި އިސްލާމީ މަރުކަޒު ފުރިގެންދިޔަކަން ފާހަގަކުރެއްވިއެވެ.
ޑރ. ޝަހީމް ވިދާޅުވީ މި މަސައްކަތްތައް ކާމިޔާބުވަމުންދަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިކަންކަމަށް ދެއްވަމުން ގެންދަވާ އެހީތެރިކަމާއި އެއްބާރުލުމުގެ ސަބަބުން ކަމަށެވެ. ރައީސް މުޢިއްޒު ވެރިކަމަށް ވަޑައިގަތީއްސުރެ ޒުވާނުންގެ ހިތްތަކުގައި ދީނީ ލޯބި އާލާކުރެއްވުމަށް ގިނަގުނަ މަސައްކަތްޕުޅުތަކެއް ކުރައްވަމުން ގެންދަވާކަންވެސް ވަޒީރު ފާހަގަކުރެއްވިއެވެ.
