އިސްލާމު ދީނަށް ތަކުރާރުކޮށް ފުރައްސާރަކޮށް ސޯޝަލްމީޑިއާގައި ވާހަކަދައްކަމުން ދިޔަ ހ. ފިލިކުރިގެ، އަހްމަދު އާމިރު (51އ) އަށް ފިޔަވަޅު އެޅުމަށް ފުލުހުން އޭނާ ހޯދަން ފަށައިފި އެވެ.
ފުލުހުން ބުނީ އަހްމަދު އާމިރު ތަހުގީގަށް ހާޒިރުކުރަން ބޭނުންވަނީ ސޯޝަލްމީޑިއާގެ އެކި ޕްލެޓް ފޯމްތަކުގައި އިސްލާމް ދީނަށް ތައުހީނުކޮށް، ދިވެހި ރައްޔިތުންގެ ދީނީ އެއްބައިވަންތަ ކަމަށް ބުރޫއަރާފަދަ ވާހަކަ ދެއްކުމާއި އިސްލާމިކް މިނިސްޓްރީ ނައްތާލުމަށް ގޮވާލައި ތަކުރާރުކޮށް ވާހަކަދައްކަމުން ދާތީ ކަމަށެވެ.
އަހްމަދު އާމިރު ފުލުހުންގެ ތަހުގީގަށް ހާޒިރުކުރަން ބޭނުންވި ނަމަވެސް ދިރިއުޅޭ ވަކިތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓު ރައްދުކުރެވިފައި ނުވާ ކަމަށްވެސް ފުލުހުން ބުންޏެވެ. އެހެންވެ ޖިނާއި މައްސަލަތައް ތަހުގީގުކުރުމުގައި ފުލުހުން އަމަލުކުރާ އިޖުރާއަތުގެ ގަވާއިދުގައިވާ ގޮތުގެ މަތިން އޭނާ ފުލުހަށް ހާޒިރުވުމަށް އާންމުކޮށް ވަނީ އަންގާ އިއުލާންކޮށްފަ އެވެ.
ޖަޕާންގައި ދިރިއުޅެމުންދާ އަހްމަދު އާމިރު އިސްލާމް ދީނަށް ފުރައްސާރަކުރަމުންދާއިރު އޭނާ ހައްޔަރުކޮށް އަދަބު ނުދޭތީ އެތައް ބަޔަކު ގެންދަނީ ނުރުހުން ފާޅުކުރަމުންނެވެ.
