ރައީސްގެ “ޖެނެރޭޝަން ބޭން އައިޑިއާ” އާއިގުޅިގެން މަޝްވަރާތައް ފަށައިފި

ރައީސް ޑރ. މުޙައްމަދު މުޢިއްޒުގެ ދުރުވިސްނުންފުޅާ އެކު ރައްކާތެރި ޖީލެއް ބިނާކުރުމަށް ޖެނެރޭޝަނަލް ބޭން ތަޢާރަފު ކުރުމަށް ސަރުކާރުން ގިނަ މަޝްވަރާތައް ފަށައިފިއެވެ.

މިއީ ފާއިތުވީ ސަރުކާރުތަކުން ނުކޮށް ދޫކޮށްލި ކަމެކެވެ. މަސްތުވާ ތަކެތި ވެސް ބޭނުންކުރުމުގެ ފުޅާ މަގު ހުޅުވުމުގެ އަސްލަކީ ދުންފަތުގެ މަސްތެވެ. މީގެކުރިން ރާއްޖޭގެ ސަރުކާރުތަކުން މަސައްކަތް ކޮށްފައިވަނީ ދުންފަތް “ފީސަބީލިއްލާހިއަށް” އާންމުކޮށް، އެމީހުން އުޅުނީ ގައުމުގެ މުސްތަގުބަލް ހަރާބު ކޮށްލުމަށެވެ. ރައީސް މުޢިއްޒު މިއަދު ނުކުމެވަޑައިގެން އުޅުއްވަނީ މަސްތުވާ ތަކެއްޗަށް ކުރީގެ ވެރިކަންތަކުގައި ހުޅުވައިލި ދޮރުތައް ބަންދު ކުރުމަށެވެ.

ރާއްޖޭގެ ކޮންމެ ގެއެއްގައި ދުންފަތުގެ އިސްތިއުމާލުކުރާ އެތައް ބަޔަކު ނެތް ގެއެއް މަދެއް ނޫނެވެ.

މާލޭގެ ކޮންމެ ހަތަރު ގެއަކުން އެއްގޭގައި މަސްތުވާތަކެތި ވިއްކާ ޑިލަރެއް ދިރިއުޅެއެވެ. އެމީހުންގެ ކައިރިޔަށް ފައިސާ ހިފައިގެން އަންނަނީ މުޅިންވެސް ދުންގަތުގެ ވަބާގައި ޖެހިފައިވާ މީހުންނެވެ.

އެހެންކަމުން މި ވަބާ އިން ގައުމު ސަލާމަތް ކުރުމަކީ ރައީސް މުޢިއްޒުގެ އެންމެ ބޮޑު އެއް އަމާޒެވެ.

މިހާރު ކުރަމުންދާ މަޝްވަރާތަކުގެ ތެރެއިން މިއަދު ހެލްތު މިނިސްޓްރީން ރާއްޖޭގެ އެކިއެކި ޖަމިއްޔާތަކާއިއެކު ވެސް މަޝްވަރާ ބައްދަލުވުމެއް ބާއްވައިފިއެވެ.

ހެލްތު މިނިސްޓްރީން ބުނީ މި ބައްދަލުވުމުގައި ޖެނެރޭޝަނަލް ބޭން ކާމިޔާބު ކަމާއެކު ތަންފީޒު ކުރުމުގައި ސަމާލުކަން ދޭންޖެހޭ ކަންކަމާ ގުޅޭގޮތުން މަޝްވަރާކުރެވިފައިވާ ކަމަށެވެ.

މީގެ އިތުރުން ހެލްތު މިނިސްޓްރީން ބުނީ ދުންފަތުން ރައްކާތެރި ޖީލެއް ބިނާކުރުމަށް ޖެނެރޭޝަނަލް ބޭން ތަޢާރަފު ކުރުމަށް ކަމާ ގުޅުންހުރި ފަރާތްތަކުގެ ޚިޔާލު ހޯދުމަށް ސަރުކާރުން ކުރަމުންދާ މަޝްވަރާތަކުގެ ތެރެއިން ދުނިޔޭގެ ޞިއްޙަތު ޖަމްޢިއްޔާ އާއި ޔުނިސެފްގެ އޮފިޝަލުންނާއި މިނިސްޓަރ އޮފް ހެލްތުން ވަނީ އިއްޔެ ބައްދަލު ކުރައްވާފައި ކަމަށެވެ.

މިގޮތުން ޖެނެރޭޝަނަލް ބޭން ކާމިޔާބު ކަމާއެކު ތަންފީޒު ކުރުމުގައި ސަމާލުކަން ދޭންޖެހޭ ކަންކަމާ ގުޅޭގޮތުން އެ އިދާރާތަކުން ވަނީ މި ބައްދަލުވުމުގައި ލަފާ ދީފައި ކަމަށް ހެލްތު މިނިސްޓްރީން ހާމަކުރެއެވެ.