ރައީސް ޑރ. މުޙައްމަދު މުޢިއްޒު ސިޑްސްގެ ކޯޗެއާކަން ކުރައްވަނީ. ކުދި ޤައުމުތަކުގެ ދުލުން އެމަނިކުފާނު ދެއްވީ ވަރަށް ފައްކާ އައިޑިއާއެއް.
ތިމާވެށީގެ ނާޒުކު މައްސަލަތަކާއި ކުރިމަތިލަމުންދާ ކުދި ޖަޒީރާ ގައުމުތަކަށް ދުނިޔެ ތާއީދުކުރާ ގޮތް އަލުން ބައްޓަން ކުރެވިދާނެ ޕްރޮޕޯސަލެއް ރައީސް ޑރ.މުޙައްމަދު މުޢިއްޒު ތަޢާރަފް ކުރައްވައިފިއެވެ.
ރާއްޖެއިން ފާއިތުވި ތަނުގައި ލޯނު ނެގިނެގީނުން ރައްޔިތުން މިތިބީ ކަރުތާފެނުގައެވެ. ނުދަރާ ރައްޔިތަކު ނެތެވެ. ކޮންމެ ރައީސަކުވެސް މަސައްކަތް ކުރައްވަނީ ލޯނުތައް ހޯދުމަށެވެ. ނަމަވެސް، މި ރައީސް ތަފާތެވެ.
ސްމޯލް އައިލެންޑް ޑިވެލޮޕްމަންޓް ސްޓޭޓްސް (އެސްއައިޑީއެސް)އިން އިއްޔެ ބޭއްވި ސްޓްރެޓެޖިކް އެކްޝަން ގްރޫޕް (އެސްއޭޖީ) ބައްދަލުވުމުގައި ކޯޗެއާ ކުރައްވަމުން ރައީސް ގޮވާލެއްވީ ކުދި ޤައުމުތަކުގެ ތަރައްގީގެ ގިއަރު މަތިކޮށްލުމަށްޓަކައި، ދަރަނިތަކަށް ލުއި ދިނުމާއި ދެމެހެއްޓެނިވި ތަރައްގީއާ ގުޅުވައިދޭ އާ ޚިޔާލެއް ކަމަށްވާ ޑެޓް ސަސްޓެއިނަބިލިޓީ ސަޕޯޓް ސާވިސް (ޑީއެސްއެސްއެސް) ވަގުތުން ލޯންޗުކުރުމަށެވެ. ރައީސް ވިދާޅުވީ ބޭނުމީ ފައިސާ އެއް ނޫން ކަމަށެވެ. ޢަދަދުތަކުން ފައިސާ ބޭނުން ނުވާ ކަމަށެވެ. ބޭނުންވަނީ މިހާރު ހުރި ބޮޑެތި ދަރަނިތަކަށް ހައްލެއް ކަމަށެވެ.
ރައީސް ޑރ. މުޢިއްޒު ގެ ތަސައްވުރުގައި ހިމެނެނީ މޫސުމަށް އަންނަ ބަދަލުތަކަށް އިންވެސްޓްކުރާ ގައުމުތަކަށް ދަރަނީގެ ބުރަ ލުއިކޮށްދީ އިނާމު ދިނުމުގެ މަގުސަދުގައި ތަފާތު “ޑިޓްރިމެންޓް ފޯ ރެސިލިއެންސް ބިލްޑިން މެކޭނިޒަމެކެވެ. މި ޚިޔާލަށް މިހާރުވެސް ބައެއް ޤައުމުތަކުގެ ސަމާލުކަމާއި ތާއީދު ލިބިފައިވާއިރު، މިއީ ގްލޯބަލް މޮޑެލްއެއްގެ ގޮތުގައި ގިނަ ޤައުމުތަކުން ދަނީ ބަލައިގަންނަމުންނެވެ.
މިއީ މާލީ އެހީތެރިކަމަށްވުރެ މާ ބޮޑު ކަމެއް، މިއީ ފުރާނަ ހިމާޔަތްކުރުމާއި މުސްތަގުބަލު ކަށަވަރުކުރުން
ރާއްޖެ ފަދަ ކުދި ޖަޒީރާ ދައުލަތްތަކަށް މާލީ އަދި ތިމާވެށީގެ ޕްރެޝަރުތައް ބޮޑުވަމުންދާކަން ފާހަގަކުރައްވައި ރައީސް ޑރ. މުޢިއްޒު ވިދާޅުވި އެވެ.
ހަތަރުވަނަ ބައިނަލްއަޤްވާމީ ކޮންފަރެންސް އޮން ފައިނޭންސިންގ ފޯރ ޑިވެލޮޕްމަންޓް (އެފްއެފްޑީ4) އަށް ދުނިޔެ ތައްޔާރުވަމުންދާއިރު، ރައީސްގެ ހުށަހެޅުން ފާހަގަކޮށްލެވެނީ ކުރިއަށް ވިސްނާ ހައްލެއްގެ ގޮތުގައެވެ.
އިޤްތިޞާދުގައި މުޅި ދުނިޔެ ތަޅުލެވި ކުރިޔަށް ކަނޑަން އުދަގޫވެފައިވާ މި ދަނޑިވަޅުގައި ރާއްޖޭގެ މި ރިޔާސީ ދައުރުގައި އަދި މިވީ ގާތްގަނޑަކަށް އެންމެ ދެއަހަރެވެ. ބާކީ ތިން އަހަރު އެބައޮތެވެ. ރައީސްގެ މި އިސްނެންގެވުމަކީ ބޮޑެތި މައްސަލަތަކަށް ސްމާޓް ހައްލުތައް ހޯދުމަށް އެހެން ކުދި ގައުމުތަކަށް ވެސް ދައްކައިދިން މަގެކެވެ.
