އީރާނުގެ ދިދައިގައިވާ ﷲ ގެ ކަލިމަފުޅުގެ ބަދަލުގައި ޖަނަވާރެއްގެ ފޮޓޯ ބަހަޓަން އެމެރިކާގެ ރައީސް ޑޮނަލްޑް ޓްރަމްޕް ކުރި މަސައްކަތް ނާކާމިޔާބު ވެއްޖެ ކަމަށް ތެހެރާނުން ބުނެފިއެވެ.
ތެހެރާންގެ ސަރުކާރު ވައްޓާލަން ޓްރަމްޕް މަސައްކަތް ކުރި ކަމަށް ތުހުމަތުކޮށް، އެ މަސައްކަތް ނާކާމިޔާބުވީ އީރާނުގެ ރައްޔިތުންނާއި ދައުލަތުގެ މުއައްސަސާތަކުން ނެގި އެކްޝަނުން ކަމަށް ބުނެއެވެ.
އީރާނުގެ އިސް އޮފިޝަލުން ވިދާޅުވީ ފަހަކަށް އައިސް ހިނގި ހަމަނުޖެހުންތަކާއި މުޒާހަރާތަކަކީ އިސްލާމީ ޖުމްހޫރިއްޔާގެ ހަމަޖެހުން ގެނައުމަށް އަމާޒުކޮށްގެން ޓްރަމްޕާއި އޭނާގެ ވާގިވެރިން އަށީގައި ތިބެގެން ހިންގި ޖަރީމާ އެއް ކަމަށާއި، އެމެރިކާ އިން އުޅުނީ މުޒާހަރާތައް ހަލަބޮލިކޮށް، ގިނަބަޔަކު މުޒާހަރާތެރޭގައި މަރާލުމަށެވެ. އޭރުން ރައްޔިތުން އިތުރަށް ހޫނުވެ، ވެރިކަން ވައްޓާލެވިދާނެ ކަމަށް ޓްރަމްޕަށް ޤަބޫލު ކުރެވުނު ކަމަށްއީރާނުގެ ނޫސްތަކުން ބުނެއެވެ.
އާންމު ތަގުރީރެއްގައި ވާހަކަފުޅު ދައްކަވަމުން ސުޕްރީމް ލީޑަރު އާޔަތުالله އަލީ ޚާމަނާއީ ވިދާޅުވީ އެމެރިކާއިން ގިނަ ދުވަސްތަކެއް ވަންދެން އީރާނުގައި ވެރިކަން ބަދަލުކުރުމުގެ މަސައްކަތް ކުރަމުން އައީ ދަތިކުރުމުގެ ފިޔަވަޅުތަކާއި ޕްރެޝަރުތަކާއި ސިއްރު އޮޕަރޭޝަންތަކުގެ ތެރެއިން ކަމަށެވެ. އޭނާ ތުހުމަތު ކުރެއްވި ގޮތުގައި ވޮޝިންޓަނުން އީރާނުގެ އިގްތިސާދު ފުނޑައިލުމަށް ގިނަ ރޭވުންތަކެއް ރޭވިއެވެ. ނަމަވެސް އެމެރިކާގެ މަސައްކަތް ވަނީ ނާކާމިޔާބު ވެފައެވއ.
ޚާމަނާއީ ވަނީ އިސްރާއީލަށް ވެސް ވަރަށް ބޮޑަށް ފާޑުވިދާޅުވެފައެވެ. އަދި އީރާނު ސަރުކާރާއި ދެކޮޅަށް ހިންގި ރޭވުންތަކުގެ އަޑީގައި އޮތް އެންމެ ނުބައި ގޭމު ކުޅުނު ބަޔަކީ އިސްރާއީލް ކަމުގައި ޚާމަނާއީ ވަމީ ސިފަކުރައްވާފައެވެ. އޭނާ ވިދާޅުވީ އިސްރާއީލާއި އެމެރިކާ ގުޅިގެން އީރާނުގެ ސަރަހައްދީ ނުފޫޒާއި ސަލާމަތީ ކަންކަން ބަލިކަށި ކުރުމަށް މަސައްކަތް ކުރި ނަމަވެސް، އެފަދަ އަމަލުތަކުގެ ސަބަބުން މުޅި ސަރަހައްދުގައި ބައިބައިވާނެ ކަމަށެވެ.
ސީދާ ޓްރަމްޕަށް އިޝާރާތް ކުރައްވައި އީރާނުގެ ލީޑަރުން ވިދާޅުވީ އިގްތިސާދީ ދަތިކުރުމުގެ ފިޔަވަޅުތަކާއި ސިޔާސީ ޕްރެޝަރު ހިމެނޭ ގޮތަށް އީރާނާއި ދެކޮޅަށް ނުބައި ނުރައްކާތެރި ސިޔާސަތުތައް ގެންގުޅުނު ނަމަވެސް އެ ހުރިހާ ކަމެއް ނާކާމިޔާބުވެފައިވާ ކަމަށެވެ. އަދި މުޒާހަރާތަކުގައި މަރުވި މީހުންގެ ޒިންމާ ޚާމަނާއީ ވަނީ ޓްރަމްޕުގެ ބޮލުގައި އަޅުވާފައެވެ.
