ސީރިޔާގެ ދަނޑުބިންތަކުން 250 ބަކަރި ވަގަށް ނެގި މައްސަލައިގައި އިސްރާއީލުގެ ސިފައިންގެ ކޮމާންޑރު ބަންދުކޮށް ވަޒީފާއިން ސަސްޕެންޑް ކޮށްފިއެވެ. އިސްރާއީލުން އޭނާ ސަސްޕެންޑް ކުރީ، މައްސަލަ ހޫނުވެ ޔަހޫދީ އަސްކަރިއްޔާ ފަޟީޙަތް ވުމުން ސަލާމަތް ކުރުމަށެވެ.
އިސްރާއީލުގެ ޗެނަލް 12 އިން ބުނީ މި ހާދިސާ ހިނގާފައިވަނީ މީގެ ދެ ހަފްތާ ކުރިން ކަމަށެވެ.
ރިޕޯޓުގައިވާ ގޮތުން ހިފާފައިވާ ގޯލާން އުސްމިނުގައި ގަދަބާރުން ބަޑަހަ ޖަހައިގެން ތިބި ޔަހޫދީ ސިފައިން މި ބަކަރިތައް އިސްރާއީލުގެ ސަރަޙައްދަށް (ހިފާފައިވާ ފަލަސްޠީނުގެ ހުޅަނގު އައްސޭރިޔަށް) ގެންދިޔައީ ޓްރަކްތަކަށް އަރުވައިގެންނެވެ.
އިސްރާއީލުގެ އަސްކަރިއްޔާއިން މިހާރު ވަނީ މި މައްސަލަ ހޫނުވެ، އެންމެ ފަހުން އެ ޓީމުގެ ކޮމާންޑަރު ސަސްޕެންޑް ކޮށްފައެވެ.
އިސްރާއީލުން، 1967 ވަނަ އަހަރުން ފެށިގެން ސީރިއާގެ ގޯލާން އުސްމިން ހިފާފައިވާއިރު، 2024 ވަނަ އަހަރުގެ ޑިސެމްބަރު މަހު ބައްޝާރުލް އަސަދުގެ ސަރުކާރު ވެއްޓުމުން ޔަހޫދީން ވަނީ ސީރިއާގެ ދެކުނުގައި އެމީހުންގެ ބާރުތައް ފުޅާކޮށްފައެވެ.
އޭގެ ފަހުން އިސްރާއީލުން ވަނީ ސީރިއާގެ ސަރަހައްދަށް 1،000 އަށް ވުރެ ގިނަ ވައިގެ ހަމަލާދީ ސީރިއާގެ ސަރަހައްދަށް 400 އަށް ވުރެ ގިނަ ފަހަރު ވަދެފައިވާ ކަމަށް ސީރިއާގެ ކަމާބެހޭ ފަރާތްތަކުން ބުނެއެވެ.
