އީރާނުގެ ނިއުކްލިއާ ސައިޓެއް
އީރާނުގެ ނިއުކްލިޔާ ޕްރޮގްރާމާ ގުޅޭގޮތުން އެމެރިކާއާއި އީރާނާ ދެމެދު ކުރިއަށްދާ މަޝްވަރާތަކުގައި ދެފަރާތުގެ މެދުގައި ބޮޑެތި ޚިޔާލުތަފާތުވުންތަކެއް އުފެދިއްޖެކަން ފެންމަތިވެއްޖެއެވެ. އެމެރިކާގެ ރައީސްގެ މަންދޫބު ސްޓީވް ވިޓްކޯފް ވިދާޅުވީ އީރާނުން އެ ގައުމުގެ ނިއުކްލިޔާ މަސައްކަތް މުޅިން ހުއްޓާލަންޖެހޭނެ ކަމަށެވެ. ނަމަވެސް އީރާނުގެ ޚާރިޖީ ވަޒީރު އައްބާސް އަރަޤްޗީ ވިދާޅުވީ އީރާނުގެ ޔޫރޭނިއަމް މުއްސަނދިކުރުމުގެ މަސައްކަތަކީ އެއްވެސް ގައުމަކުން އެކަމާއިގުޅޭ “މަޝްވަރާކުރެވޭނެ ކަމެއް ނޫން” ކަމަށެވެ.
އޮމާނުގައި ބޭއްވި ފުރަތަމަ ބުރުގެ މަޝްވަރާތަކަށްފަހު، ދެވަނަ ބުރުގެ މަޝްވަރާތައް އިޓަލީގެ ވެރިރަށް ރޯމްގައި އަންނަ ހޮނިހިރު ދުވަހު ބޭއްވުމަށް ވަނީ ހަމަޖެހިފައެވެ. މި މަޝްވަރާތަކުގައި އެމެރިކާގެ ފަރާތުން ދެންވެސް ބައިވެރިވާނީ ވިޓްކޯފް އެވެ. އަދި އީރާނުގެ ފަރާތުން ބައިވެރިވާނީ ކުރިންވެސް ބައިވެރިވި ޚާރިޖީ ވަޒީރު އަރަޤްޗީ އެވެ.
އިންޓަނޭޝަނަލް އެޓޮމިކް އެނަރޖީ އޭޖެންސީ (އައިއޭއީއޭ)ގެ ވެރިޔާ ރަފައެލް ގްރޮސީ ވަނީ ތެހެރާނަށް ޒިޔާރަތްކުރައްވާފައެވެ. އައިއޭއީއޭއިން ބުނެފައިވަނީ އީރާނުން 60 އިންސައްތައަށް މުއްސަނދިކޮށްފައިވާ ޔޫރޭނިއަމްގެ ސާމްޕަލެއް ފެނިފައިވާ ކަމަށެވެ. މިއީ އެމެރިކާއާއި ހުޅަނގުން ރުހޭ ގޮތެއް ނޫނެވެ. އެމީހުން ބުނަނީ މިއީ އާންމު ބޭނުންތަކަށް ބޭނުންކުރެވޭނެ މިންވަރެއް ނޫން ކަމަށާާއި އެއަށްވުރެ އިތުރު ޢަދަދެކެވެ.
ގްރޮސީ ވިދާޅުވެފައި ވަނީ އީރާނުން ނިއުކްލިއަރ ހަތިޔާރު އުފެއްދުމުގެ ޤާބިލުކަން ހޯދުމާއި ދެމެދު މިހާރު އޮތީ މަދު ހަފްތާތަކެކެވެ.
ބްލޫމްބާގް އިކޮނޮމިކްސްގެ މެދުއިރުމަތީގެ ޖިއޯ-އިކޮނޮމިކްސް ލީޑް ދީނާ އިސްފަންދިޔާރީ ވިދާޅުވީއެމެރިކާ އެދެނީ އީރާނުގެ ޔުރޭނިއަމް ސުމަކަށް ހެދުން ކަމަށްވާނަމަ ވާހަކަތައް ފެށުމުގެ ކުރިން މަޝްވަރާތައް ނިމޭނެއެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ އޭނާގެ އެންމެ އިސް، ގައުމީ ސަލާމަތީ ވަޒީރުންނާއެކު އީރާނުގެ ނިއުކްލިޔާ ޕްރޮގްރާމާ ގުޅޭގޮތުން މަޝްވަރާކުރައްވާފައެވެ. ޓްރަމްޕް ވަނީ އީރާނުން އެ ޕްރޮގްރާމު ހުއްޓަނުލައިފިނަމަ އީރާނަށް ހަމަލާ ދޭނެކަމަށް ވެސް ބުނެފައެވެ.
