ރާއްޖޭގެ ގިނަ އިލްމުވެރިންތަކެއް ހިމެނޭ އިލްމުވެރިންގެ ގުޅުމުން، އިދިކޮޅު އެމްޑީޕީގެ ކުރީގެ ޗެއާޕާސަން އަދި ރައްޔިތުންގެ މަޖިލީހުގެ ކުރީގެ ނައިބު ރައީސް ރީކޯ މޫސާ މަނިކުގެ މައްސަލައެއް ފުލުހުންނަށް ހުށަހަޅައިފިއެވެ.
އިލްމުވެރިންގެ ގުޅުމުން ނެރުނު ބަޔާނެއްގައި ބުނެފައިވަނީ، މޫސަގެ މައްސަލަ ފުލުހުންނަށް ހުށަހެޅީ، ރާއްޖޭގެ ދީނީ އިލްމުވެރިންނަކީ “މުރުތައްދުވެފައިވާ” ބައެއް ކަމަށް ވިދާޅުވެ ދެއްކެވި ވާހަކަފުޅަކާ ގުޅިގެން އެ މައްސަލަ ތަހުގީގު ކުރުމަށް ކަމަށެވެ.
މީގެ އިތުރުން އިސްލާމީ މަރުކަޒުގެ ބައެއް އިމާމުން “ބޮޑު މުސާރަ” ނަންގަވައިގެން ތިއްބެވުމަކީ ޖުވާ ކުޅުން ފަދަ ކަމެއް ކަމަށް ސިފަ ކުރައްވަމުން މޫސަ ވަނީ ރާއްޖޭގެ ބައެއް ދަންނަބޭކަލުންނަކީ “މުރުތައްދުވެފައިވާ” ބައެއް ކަމަށް ތުހުމަތު ކުރައްވައިފައެވެ.
އެމްޑީޕީ ހަރުގެ ޖަލްސާގައި ވާހަކަ ދައްކަވަމުން މޫސަ ވަނީ ރާއްޖޭގައި ތިއްބެވި ދީނީ އިލްމުވެރިންނަކީ އަމިއްލަ މަންފާއަށްޓަކައި “އިންޖީނު ދޯންޏެއްހެން” ކުއްލިއަކަށް ހަދީސްތަކާއި އާޔަތްތައް ބަދަލުކޮށްގެން ވާހަކަދައްކާ ބައެއް ކަމަށް ވިދާޅުވެފައެވެ. އަދި ސިޔާސީ ގޮތުން ނުކުންނަ ދަންނަބޭކަލުންނަކީ ގައުމަށް އޮތް “ބޮޑު މުސީބާތެއް” ކަމަށް ވިދާޅުވެ، އެ ބޭފުޅުން ގޭގައި މަޑުން ތިއްބެވުމަށް ވެސް އޭނާ ގޮވާލެއްވިއެވެ.
ފުލުހަށް ހުށަހެޅި މައްސަލައިގައި އެ މައްސަލަ ތަހުގީގުކޮށް އޭނާއަށް ފިޔަވަޅު އެޅުމަށް އެދިފައިވާ ކަމަށް ވެސް ބުނެފައިވެއެވެ.
މި މައްސަލައިގައި ކަންބޮޑުވުން ފާޅުކޮށް އިލްމުވެރިންގެ ގުޅުމުން، ފުލުސް އޮފީހަށް ފޮނުވި ސިޓީގައި ބުނެފައިވަނީ، މިދިޔަ އަންގާރު ދުވަހުގެ ރޭ ބޭއްވި އެމްޑީޕީގެ ޖަލްސާގައި މޫސަ ދެއްކި ވާހަކައަކީ ވަރަށް ނުރައްކާތެރި އަދި ހައްސާސީ މައްސަލައެއް ކަމަށެވެ. އެ ވާހަކަތަކަކީ ދީނީ އިލްމުވެރިންނާ މެދު ނަފުރަތު އުފެއްދުމަށް ދައްކަވާފައިވާ ނޭއްގާނީ، ދަށުދަރަޖައިގެ ޒިންމާދާރުކަން ކުޑަ ވާހަކަތަކެއް ކަމަށް ބުނެފައިވެއެވެ.
އިލްމުވެރިންމާ މެދު މިފަދަ ނުރައްކާތެރި ތުހުމަތުތައް ކުރުމަކީ، ޑރ. އަފްރާޝީމް އަލީ އެކޭ އެއްފަދައިން، މިހާރު ތިއްބެވި ދީނީ އިލްމުވެރިންގެ ފުރާނައަށް ވެސް ނުރައްކާވެދާނެ ފަދަ ޖަރީމާތަކަށް މަގުފަހިވެގެން ހިނގައިދާނެ ކަމެއް ކަމަށް ވެސް ބުނެފައިވެއެވެ.
މޫސާގެ މި އަމަލަކީ ރާއްޖޭގެ ގާނޫނުތަކާ ކަނޑައެޅިގެން ހިލާފު އަމަލެއްކަން ފާހަގަކޮށް، އެ ބަޔާނުގައި ގާނޫނީ ތިން ނުކުތާއެއް ފާހަގަކޮށްފައިވެއެވެ.
އޭގެ ތެރޭގައި ހިމެނެނީ ޓެރަރިޒަމް މަނާކުރުމުގެ ދަށުން މީހުންނަށް އަނިޔާވެރިވުމަށް ހިތްވަރު ލިބޭ ގޮތަށް “ތަކްފީރު” ކުރުމުގެ ފިކުރު ފެތުރުން ނުވަތަ މުސްލިމުން ކާފަރު ކުރުމަކީ ކުށެއް ކަމަށާއި ދީނީ އެއްބައިވަންތަކަން ހިމާޔަތްކުރުމުގެ ގާނޫނުގެ ދަށުން ދީނީ އެއްބައިވަންތަކަން ގެއްލޭ ފަދަ އަދި މީހުންގެ މެދުގައި ފިތުނަ އުފެދޭ ގޮތަށް ވާހަކަ ދެއްކުން މަނާ ވުމާ ހިލާފުވުމާއި، ގާނޫނުލް އުގޫބާތުގައި މުސްލިމަކު ކާފަރެއްގެ ގޮތުގައި ސިފަކުރުމާއި، މީހަކާ މެދު ނަފުރަތު އުފެއްދުމުގެ ގަސްތުގައި އެ މީހަކީ މުރުތައްދެއް ކަމަށް އާންމު ތަނެއްގައި ތުހުމަތުކުރުމަކީ ކުށެއް ކަމަށް އޮންނަ އޮތުމެވެ.
މި ނުކުތާތަކަށް ރިއާޔަތްކޮށް، މޫސާ މަނިކާއި އޭނާ ދައްކަވާފައިވާ ވާހަކަތައް ލައިވްކޮށް ބްރޯޑްކާސްޓް ކުރި ޗެނަލްގެ މައްސަލަ ތަހުގީގުކޮށް، އެކަމާ ގުޅުން ހުރި ފަރާތްތަކާ މެދުގައި ގާނޫނީ ފިޔަވަޅު އަޅައިދިނުމަށް އެ ސިޓީގައި ވަނީ އެދިފައެވެ.
