ހިޒްބުالله އަށް ޙަމަލާ ދިނުމާއި މެދު ގޮތެއް ނިންމުމަށް އެމެރިކާ އާއި އިސްރާއީލުން ކުއްލި މަޝްވަރާއެއް ފަށައިފި ކަމަށް އިތުބާރު ހުރި މަސްދަރަކުން ބުނެފިއެވެ.
ލުބުނާނުގެ އީރާނާއި ގުޅިފައިވާ މުޖާހިދުންގެ ޖަމާޢަތް، ޙިޛްބުالله އާއި ދެކޮޅަށް އަސްކަރީ ފިޔަވަޅު އަޅަންވީތޯ ނިންމުމަށް އެމެރިކާ އާއި އިސްރާއީލުން ކުއްލި މަޝްވަރާތަކެއް ފަށައިފިއެވެ.
ހަނގުރާމައެއް އަދި އިއުލާން ނުކުރާއިރު، ޙިޛްބުالله އަށް ރޮކެޓް ހަމަލާތަކެއް ދޭނެ ގޮތަކާއި މެދު ވޮޝިންޓަނުން ވަނީ އިސްރާއީލުގެ އޮފިޝަލުންނާއި ގާތުން ގުޅިފައެވެ.
“އަހަރެމެންގެ ޑިޕްލޮމެޓިކް މަސްދަރުތަކުން ބުނާ ގޮތުގައި ޙިޛްބުاللهގެ އަސްކަރީ ތަންތަނަށް އަމާޒުކޮށްގެން ޙަމަލާދިނުމަށް ވޮޝިންޓަނުން ތާއީދުކުރޭ. ނަމަވެސް މެދުއިރުމަތީގައި މިކަމުން ނުކުމެދާނެ ނުރައްއްކަލަކަށް ވިސްނާފައި، ފުޅާ ހަނގުރާމައަކުން ސަލާމަތްވުމަށް ބާރުއަޅާ” އިސްރާއީލުގެ މަސްދަރުން ބުންޏެވެ.
މި މަޝްވަރާތައް ގުޅިފައި އޮތީ 2023 ވަނަ އަހަރުގެ ފަހުކޮޅު އުފެދުނު ދިގުދެމިގެންދިޔަ ހަމަނުޖެހުންތަކާއެވެ. ނަމަވެސް ލިތާނީ ކޯރުގެ ދެކުނުގައި ޙިޛްބުاللهގެ ހަތިޔާރާއި ނުފޫޒު ގަދަވެފައިވާއިރު އެއީ އިސްރާއީލަށް އޮތް ނުރައްކަލެކެވެ. އެ މައްސަލަ އޮތީ ހައްލު ނުކުރެވިއެވެ.
2024 ގައި އިސްރާއީލް-ލުބުނާން ހަނގުރާމަ ހުއްޓާލުމުގެ އެއްބަސްވުމެއް ހެދި ނަމަވެސް، އިސްރާއީލުގެ ސިފައިން ވަނީ ލުބުނާނުގެ ޙިޛްބުالله އާއި ގުޅުން ހުރި ކަމަށް ޝައްކު ކުރެވޭ ބައެއް ތަންތަނަށް ދޭތެރެދޭތެރެ އިން ޙަމަލާ ދީފައިކަން ފާހަގަ ކުރެވެއެވެ.
މީގެ އިތުރުން، އެމެރިކާ އާއި އިސްރާއީލުގެ ވަނީ، ލުބުނާނުގެ ސަރުކާރު ނޫން އެހެން އެއްވެސް ބަޔަކު ލުބުނާނުގެ ފަސްގަނޑުގައި ހަތިޔާރު ނުގެންގުޅެވޭނެ ކަމަށް ބުނެ އެކަން އެމަގުން ކުރުމަށް ލުބުނާނު ސަރުކާރަށް އިންޒާރު ދީފައެވެ. އެހެންކަމުން ލުބުނާނު ސިފައިން ގެންދަނީ ހަ ގުރާމަވެރި ޖަމާޢަތްތަކުގައިވާ ހަތިޔާރުތައް އަތުލަމުންނެވެ. ނަމަވެސް ޙިޛްބުالله އިން މިކަމަށް ލުބުނާނުގެ ސަރުކާރަށް އެއްބާރުލުން ދިނުމަށް ދެކޮޅު ހަދައެވެ.
އެމެރިކާގެ އޮފިޝަލުން ކަންބޮޑުވަނީ ޙިޛްބުالله އަށް ޙަމަލާ ދީފި ނަމަ ރައްދުގައި އީރާން ނުކުމެދާނެތީއެވެ. އެހެންކަމުން އެކަމާއި މެދު ވެސް އެމެރިކާ އާއި އިސްރާއީލުން ގެންދަނީ މަޝްވަރާ ކުރަމުންނެވެ.
