ރައްޔިތުންގެ މަޖިލީހުގެ މެންބަރުންނާއި، މިނިވަން މުއައްސަސާތަކުގެ އިސްވެރިންގެ އިތުރުން، ދައުލަތުގެ ކުންފުނިތަކުގެ ވެރިންނާއި، މުސްތަގިއްލު މަގާމުތަކުގައި ތިއްބަވާ ބޭފުޅުން ވެސް މާލީ ބަޔާން ހުށަހަޅަން ޖެހޭ ގޮތަށް އުސޫލުތައް އިތުރަށް ހަރުދަނާކުރުމަށް ރައްޔިތުންގެ މަޖިލީހަށް އިސްލާހެއް ހުށަހަޅައިފިއެވެ.
މި އިސްލާހު ހުށަހެޅިފައި މިވަނީ، މިދިޔަ ދުވަސްތަކުގައި ރައްޔިތުންގެ މަޖިލީހުގެ މެންބަރުންގެ މާލީ ބަޔާންތައް އާންމުކުރުމުން އާންމުންގެ ފާޑުކިޔުންތަކެއް އަމާޒުވެފައިވާ ދަނޑިވަޅެއްގައެވެ. އެ ބަޔާންތަކަކީ މެންބަރުންގެ ހަގީގީ އާމްދަނީއާއި މުދާ ހާމަކުރާ ބަޔާންތަކެއް ނޫން ކަމަށް ބުނެ ވަރަށް ބޮޑަށް ފާޑުކިޔުންތައް އަމާޒުވެފައި ވެއެވެ.
ހުށަހަޅާފައިވާ އިސްލާހުގައި ބުނެފައިވަނީ، މަޖިލީހުގެ މެންބަރުކަމުގެ ދައުރު ފަށާއިރު، އެ މީހެއްގެ މިލްކިއްޔާތުގައިވާ މުދަލާއި، ފައިސާ އާއި، ވިޔަފާރީގެ މަސްލަހަތުތަކާއި، އަރަންޏާއި ދަރަނި ހާމަކުރުމުގެ ގޮތުން، މަގާމުގެ ހުވާކުރި ދުވަހުގެ ހާލަތު އަންގައިދޭ ބަޔާނެއް، ހުވާކުރާ ތާރީހުން ފެށިގެން 30 ދުވަހުގެ ތެރޭގައި މަޖިލީހުގެ އަމީންއާންމާއި ހިއްސާކުރަން ޖެހޭނެ ކަމަށެވެ. މީގެ އިތުރުން މިފަދަ ހުރިހާ ބަޔާނަކީ ވެސް އިންސްޓިޓިއުޓް އޮފް ޗާޓާޑް އެކައުންޓަންޓްސްއިން ލައިސެންސް ދޫކޮށްފައިވާ އޮޑިޓަރަކު ވެރިފައި ކޮށްފައިވާ ބަޔާނަކަށް ވާންވާނެ ކަމަށް ވެސް އިސްލާހުގައި ހިމަނާފައި ވެއެވެ.
އަދި މިނިވަން މުއައްސަސާތަކުގެ މެންބަރުންނާއި މުސްތަގިއްލު މަގާމުތަކުގައި ތިބި މީހުން ވެސް މަގާމާއި ހަވާލުވާ ތާރީހުން ފެށިގެން އެއް އަހަރު ތެރޭގައި މާލީ ބަޔާން އޮޑިޓަރ ޖެނެރަލަށް ފޮނުވުމަށް ހުށަހަޅާފައި ވެއެވެ. މި ބަޔާންތައް އޮޑިޓަރ ޖެނެރަލަށް އާންމުކުރުމުގެ ބާރު ދޭން ވެސް ވަނީ ހިމަނާފަ އެވެ.
ހަމަ އެހެންމެ، ދައުލަތުގެ ކުންފުނިތަކުގެ ޗެއާޕާސަނުންނާއި، މެނޭޖިން ޑިރެކްޓަރު، ޑެޕިއުޓީ މެނޭޖިން ޑިރެކްޓަރު، ޗީފް އޮޕަރޭޓިން އޮފިސަރުން ވެސް މަގާމާ ހަވާލުވާތާ 30 ދުވަހުގެ ތެރޭގައި މާލީ ހާލަތު އަންގައިދޭ ބަޔާނެއް ޕީސީބީއަށް ހުށަހަޅަން ޖެހޭނެ ކަމަށް އިސްލާހުގައިވެ އެވެ. އަދި އެ ބަޔާންތައް ޕީސީބީއަށް އާންމުކުރުމުގެ ބާރު ދިނުމަށް ވެސް ވަނީ ހުށަހަޅާފަ އެވެ.
ރައްޔިތުންގެ މަޖިލީހުގެ ގިނަ އަދަދެއްގެ މެންބަރުންގެ މާލީ ބަޔާންތައް އާންމުކޮށްފައިވާއިރު، ސަރުކާރުގެ ވެރިންގެ މާލީ ބަޔާން އާންމު ކުރުން ގާނޫނަކުން ލާޒިމު ނުކުރެއެވެ.
