ފެންޓޯނިއާގޭ ނުވަވަނަ ފަންގިފިލާއިން ވެއްޓި، ބޮޑެތި އަނިޔާތަކާއެކު ފަރުވާ ހޯދަމުންދާ 21 އަހަރުގެ ހައްވާ ޔުމްނު ރަޝީދު، އިތުރު ފަރުވާއަށް ސަރުކާރުގެ ޚަރަދުގައި މެލޭޝިއާއަށް ދާދި ދެންމެއަކު ފުރުވާލައިފިއެވެ.
ޔުމްނުއާއެކު ސިއްހީ އެހީތެރިންނާއި ޑޮކްޓަރުން ވެސް ދިޔައިރު ޓިކެޓާއި އެހެނިހެން ހަރަދުތައް ހަމަޖައްސާފައިވަނީ އެންސްޕާއިންނެވެ. ސްޓްރެޗަރުގައި ޔުމްނު ގޮވައިގެން މެލޭޝިއާއަށް ފުރާ ޝެޑިއުލް ފުލައިޓް ކަމަށްވާ UL104، ވެލާނާ އިންޓަރނޭޝަނަލް އެއާޕޯޓުން ނައްޓާލީ މިރޭ 22:02 ހާއިރުއެވެ.
މިކަމަކީ ސަރުކާރުން ހާއްސަ އިސްކަމެއް ދީގެން ހަމަޖެއްސި ކަމެއްކަން ފާހަގަކުރެވެއެވެ. ޔުމްނުގެ އާއިލާއިން ރޭ މަޢުލޫމާތު ދީފައިވާ ގޮތުގައި، އިތުރު ފަރުވާއަށް ޔުމްނު މެލޭޝިއާއަށް ގެންދިއުމަށް ހުރިހާ އިންތިޒާމުތައް ސަރުކާރުގެ ފަރާތުން ހަމަޖައްސައިދީފައިވެއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މިފަދަ އަވަސް ފިޔަވަޅެއް އެޅުމަކީ، ދަތި ހާލަތުގައި ތިބޭ ރައްޔިތުންނަށް އެހީތެރިވުމަށް ސަރުކާރުން ދޭ އަހައްމިއްޔަތުކަން ދައްކުވައިދޭ ކަމެކެވެ.
ޔުމްނުގެ އާއިލާއިން ކުރިން ބުނެފައިވާ ގޮތުގައި މި ވަގުތު އާއިލާގެ އަމާޒަކީ ޔުމްނުއަށް ފަރުވާ ހޯދުމެވެ. އަދި ޔުމްނު އަވަހަށް ރަނގަޅުވެ، އާންމު ހާލަތަށް ރުޖޫޢަވުމަށް އެދޭ ކަމަށާއި، ހިނގައިދިޔަ ހާދިސާގެ ހުރިހާ ކަމެއް އެނގިގެންދާނެ ކަމަށް އުންމީދުކުރާ ކަމަށްވެސް ބުނެފައިވެއެވެ.
