އެމެރިކާގެ ހަނގުރާމަ މަތީ ބޮޑެތި މަނަވަރުތައް ފައްތާލައި، ގަލްފުގައި ތިބި އެމެރިކާގެ ބޭސް ތައް ވެސް ފޮހެލާ ވަރުގެ “ސިއްރު ހަތިޔާރު” ތަކެއް އީރާނުގައި އެބަހުރި ކަމަށް އިނގިރޭސިވިލާތުގެ މަސްދަރަކުން ބުނެފިއެވެ.
އެ މަސްދަރުން ބުނީ އީރާނުން ދޭ ޙަމަލާގެ ސަބަބުން އެމެރިކާގެ މަނަވަރުގައިވާ އެންމެން ވެސް މަރުވާނެ ކަމަށާއި، ޑޮނަލްޑް ޓްރަމްޕް ގަލްފް ސަރަޙައްދަށް ފޮނުވި ފަޔަރ ޖެޓްތައް ވެސް ވައްޓާލާނެ ކަމަށެވެ.
އެމެރިކާގެ އަސްކަރިއްޔާ ފުނޑާލުމަށް ތެހެރާނުން އެކްޝަން ނަގާނީ އެމެރިކާއިން “ޅައެއްޗެއް އަޅައިފި ނަމަ”ކަމަށް އީރާނުގެ ތަރުޖަމާނު ބުނެފައި ވެއެވެ.
ޓްރަމްޕް ވަނީ މެދުއިރުމައްޗަށް 1،500 ސިފައިން ފޮނުވާކަން ހުކުރު ދުވަހު އިޢުލާންކޮށްފައެވެ. އަދި އީރާނުގެ ވެރިކަން ބަދަލު ކޮށްލާނެ ކަމަށް ބުނެ އިންޒާރު ވެސް ދީފައެވެ.
އީރާނުގެ އަސްކަރީ ކޮމާންޑުގެ އެޑްވައިޒަރެއް ކަމަށްވާ ޖެނެރަލް ޤުރުބާނީ އާއި ޙަވާލާދީ އިނގިރޭސި މަސްދަރުން ބުންޏެވެ. “އެމެރިކާ.. ކުޑަވެސް ޅައެއްޗެއް ހަދައިފި ނަމަ މި ބޯޓުތައް އެމީހުންގެ ފަޅުވެރިންނާއި ބޯޓުތަކާއެކު ކަނޑުގެ އަޑިއަށް ފޮނުވާނަން ދެ މިސައިލް ނުވަތަ އާ ދެ ސިއްރު ހަތިޔާރު ބޭނުންކޮށްގެން”.
އީރާނުގެ ޙަމަލަ ވަރުގަދަ ވާނެ ކަން ޚުދު ޓްރަމްޕް ވެސް ޤަބޫލު ކުރެއެވެ.
ހުޅަނގުގެ ތަޖުރިބާކާރުން ބުނާ ގޮތުގައި އީރާނުގެ މިސައިލް ޕްރޮގްރާމާއި ޚާއްސަކޮށް ދުރު ރާސްތާގެ ބެލިސްޓިކް މިސައިލްތަކާއި މެދު ކަންބޮޑުވާން ޖެހެއެވެ.
