ޣިރާޤުގެ ކުރީގެ ލީޑަރު ޞައްދާމް ޙުސައިން ދަންޖައްސައި އަވަހާރަކޮށްލައި އެމެރިކާއިން ވަނީ އެ މީހުންގެ ގޮނޑި ކޮއްކޮ ސަރުކާރެއް ޣިރާޤުގައި ޤާއިމް ކޮށްފައެވެ. އެމެރިކާއިން ޣިރާޤަށް އަރައިގަތީ 2003 ވަނަ އަހަރުގައެވެ. ޞައްދާމް އަތުލައިގަނެ އަވަހާރަކޮށްލާފައި ވަނީ 2006 ވަނަ އަހަރުގައެވެ. އޭގެފަހުން އެމެރިކާއިން ކޮންމެ އަހަރަކު ޣިރާޤަށް އެތައް ސަތޭކަ މިލިއަން ޑޮލަރެއް ދެއެވެ. ކޮންމެ އަހަރަކު ގާތްގަނޑަކަށް 400–500 މިލިއަން ޑޮލަރު އެމެރިކާ އިން ޣިރާޤަށް ދެއެވެ. 2003 ވަނަ އަހަރުން ފެށިގެން އެމެރިކާ އިން ޣިރާޤަށް ދިހަވަރަކަށް ބިލިއަން ޑޮލަރު ދީފައި ވެއެވެ.
މި ހުރިހާ ކަމެއް މިހެން އޮއްވައި، ޣިރާޤުން މި ވަނީ އެމެރިކާ އަށް ހިންދިރުވާލަން އުނދަގޫ ކޮށްފައެވެ. އީރާނު މައްސަލައިގައެވެ. އީރާނަށް ޙަމަލާ ދިނުމަށް އެމެރިކާއިން ރޭވިޔަސް ޣިރާޤުގެ ކަނޑާއި ޖައްވާއި ބިމުގެ އެއްވެސް ސަރަޙައްދެއް އެކަމުގައި ބޭނުން ނުކުރުމަށާއި، އެއީ ޣިރާޤުން ދެކޮޅު ހަދާ ކަމެއް ކަމަށް ޣިރާޤުގެ ސިފައިންގެ ކޮމާންޑަރ އިން ޗީފްގެ ރަސްމީ ތަރުޖަމާނު ސަބާޙް އަލް ނޫމާން މި ވަނީ ޓްރަމްޕުގެ ސަރުކާރަށް އަންގާފައެވެ. ނޫމާން މިހެން އެންގެވި އިރު އީރާނާއި ޣިރާޤަކީ އެއްގަލަކަށް އަރާ ދެޤައުމެއް ވެސް ނޫނެވެ. ނަމަވެސް ސަރަޙައްދީ ސަލާމަތަށް ޣިރާޤުން ވިސްނީއެވެ.
ޣިރާޤުން ބުނީ އެ ޤައުމުން ބޭނުންވަނީ އަވަށްޓެރި ޤައުމުތަކުގެ ސަލާމަތާއި ހަމަޖެހުމެވެ.
ނޫމާން ވިދާޅުވީ ޞުލްޙަވެރި އަދި ޑިޕްލޮމެޓިކް ވަޞީލަތްތަކުން މައްސަލަތައް ޙައްލު ކުރުމަށް އެދޭ ކަމަށާއި، ހުރިހާ ފަރާތްތަކަށް ވެސް މަޝްވަރާއަށް އިސްކަން ދިނުމާއި، މައްސަލަތައް ގޯސްވުމުން ދުރުހެލިވުމަށް ގޮވާލައްވާ ކަމަށެވެ.
ނޫމާން ވަނީ އެއްވެސް ޤައުމަކަށް އަމާޒުކޮށްގެން ހިންގާ އެއްވެސް އަސްކަރީ އޮޕަރޭޝަނެއްގެ ލޯންޗް ޕެޑެއްގެ ގޮތުގައި ޣިރާޤުގެ ވައިގެ ސަރަހައްދު ނުވަތަ ކަނޑުގެ ސަރަހައްދު ވެސް ބޭނުން ކުރުމާއި ދެކޮޅު ހަދާކަން ތަކުރާރު ކުރައްވާފައެވެ.
އީރާނަށް ޙަމަލާ ދިނުމަށް ޓްރަމްޕް ބޭނުންވިއިރު އޭނާ ހީކުރި ގޮތުގައި އީރާނުގެ ވަށައިގެން ތިބި ޢަރަބި ޤައުމުތަކުން އެމެރިކާ އަށް އެއްބާރުލުން ދޭނެއެވެ. ޚާއްޞަކޮށް ޣިރާޤެވެ.
