އިނގިރޭސި ޕްރިމިއާ ލީގުގެ ޗެލްސީގެ ހެޑް ކޯޗުގެ މަގާމުން އެންޒޯ މަރެސްކާ ވަކިވުމާ ގުޅިގެން، އެ މަގާމަށް ލިއަމް ރޮސީނިއާ ހަމަޖައްސައިފިކަން އެ ކްލަބުން އިއުލާންކޮށްފިއެވެ.
ޗެލްސީ އާއި ރޮސީނިއާ ހަވާލުވީ 6 އަހަރުދުވަހުގެ ކޮންޓްރެކްޓެއްގައެވެ. އެއީ 2032 އާއި ހަމަޔަށެވެ.
ރޮސީނިއާ ސްޓެމްފޯޑް ބްރިޖަށް ބަދަލުވީ ސްޓްރަސްބާގްގައި ކާމިޔާބު ދުވަސްތަކެއް ހޭދަކުރުމަށްފަހުއެވެ. އެގޮތުން އޭނާ ވަނީ އެ ކްލަބާއެކު ހޭދަކުރި ފުރަތަމަ ސީޒަނުގައި، ވޭތުވެދިޔަ 19 އަހަރު ތެރޭގައި ފުރަތަމަ ފަހަރަށް އެ ޓީމު ޔޫރަޕްގެ މުބާރާތަކަށް ކޮލިފައިކޮށްދީފައެވެ. ސްޓްރަސްބާގްގެ ކުރިން އޭނާ ވަނީ އިނގިރޭސިވިލާތުގެ ހަލް ސިޓީ އާއި ޑާބީ ކައުންޓީގައި ވެސް ކޯޗިންގް ދައުރުތަކެއް އަދާކޮށްފައެވެ.
