މާލޭގެ މައި ވިޔަފާރި ބަނދަރު ތިލަފުއްޓަށް ބަދަލުކޮށް އެ ތަނުގައި ތަރައްގީކުރާ ޒަމާނީ ބަނދަރު ”ދުބާއީ ޕޯޓްސް ވޯލްޑް“އަށް ވިއްކާލަން ސަރުކާރުން ނިންމާފައިވާ ކަމަށް ވިދާޅުވެ ކުރީގެ ރައީސް އަބްދުﷲ ޔާމީން ވިދާޅުވި ވާހަކަތަކަކީ ޙަޤީޤަތާއި ޚިލާފު ވާހަކަތަކެއް ކަމަށް މާލީ ވަޒީރު މޫސާ ޒަމީރު ވިދާޅުވެއްޖެއެވެ.
ޔާމީން ވިދާޅުވީ އެމަނިކުފާނުގެ ވެރިކަމުގައި ވެސް ޑީޕީ ވޯލްޑުން އެފަދަ ހުށަހެޅުމެއް ހުށަހެޅި ކަމަށާއި ނަމަވެސް އެކަން ނުކުރެވޭނެކަން އެ ކުންފުންޏަށް އެންގެވި ކަމަށެވެ.
”ދެން މީގަ މުއިއްޒަށް ލިބޭ ފައިސާއެއް ލިބޭނެ. ޒަމީރަށް ލިބޭ ފައިސާއެއް ލިބޭނެ. މި ހުންނަނީ ޖިނާއީ ބޮޑެތި ކަންތައްތައް،“ ޔާމީން ވިދާޅުވި އެވެ.
މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)އިން ކުރިއަށް ގެންދާ ދިއްދޫ ބިން ހިއްކުމުގެ މަސައްކަތް ރަަސްމީކޮށް ފައްޓަވައިދެއްވައި ވާހަކަދައްކަވަމުން ޒަމީރު މިއަދު ވިދާޅުވީ ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގަތް ފަހުން އިގްތިސާދަށް އައި ބަދަލާއެކު، ދުނިޔޭގެ ވަރަށް ގިނަ ކުންފުނިތަކުން ރާއްޖޭގައި އިންވެސްޓުކުރަން ބޭނުންވެފައިވާ ކަމަށެވެ.
”ޕޯޓަށް ވެސް، އެއާޕޯޓުގައި ހުރި ކަންކަމަށް ވެސް އަދި ދެން ހުރި ކަންކަމަށް ވެސް އިންވެސްޓުކުރަން ބޭނުންވޭ. ކޮންމެ މީހެއް ޕްރޮޕޯސަލެއް ހުށަހެޅިޔަސް [ރައީސް] ބައްލަވާނެ. އޭގެ މާނައަކީ ރައްޔިތުންނަށް ދެރަވާނެ ގޮތަކަށް ރައީސް ކަމެއް ކުރެއްވީކީއެއް ނޫން. ބަޔަކު ޕްރޮޕޯސަލެއް ހުށަހެޅުމަކީ އަދި ރައީސް އެ ގަބޫލުކުރައްވާ އެކަމެއް ކުރީކީއެއް ނޫން،“ ޔާމީންގެ ނަން ވިދާޅުނުވެ ޒަމީރު ވިދާޅުވި އެވެ.
މިނިސްޓަރު ވިދާޅުވީ ރައީސް މުއިއްޒަކީ އިލްމީ ބޭފުޅަކަށްވާތީ ޕްރޮޕޯސަލްތަކާ މެދު އެމަނިކުފާނު ގޮތް ނިންމަވަނީ ކަމާ ގުޅޭ ވަޒީރުންނާ އެހެންވެސް ބޭފުޅުންނާ މަޝްވަރާ ކުރެއްވުމަށްފަހު ކަމަށެވެ.
މާލޭގެ މައި ވިޔަފާރި ބަނދަރު ވިއްކާލަން ނިންމާފައިވާ ކަމަށް ބުނެ ދައްކަމުންދާ ވާހަކަތަކަކީ ދޮގެއް ކަމަށް މިނިސްޓަރު ޒަމީރު ވަރަށް ސާފުކޮށް ވިދާޅުވި އެވެ. ރައީސް މުއިއްޒު ކޮންމެ ކަމެއްވެސް ނިންމަވާނީ ރައްޔިތުންނަށް އެންމެ ފައިދާވާ ގޮތަށް ކަމަށްވެސް ޒަމީރު ވިދާޅުވި އެވެ.
