ކުޑަކުއްޖާ އަށް ދިން ސިޔާސީ ޙަމަލާ ޢާއިލާގެ ކޮޅަށް ނިންމައިފި

ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ދަރިކަލުން އުމައިރު މުހައްމަދު މުއިއްޒުގެ ކަރާމާތަށް އެމްޑީޕީގެ އިސް އެކްޓްވިސްޓުން ކަމަށްވާ މަރިޔަމް ޒުބައިރު (މަންދީ) އާއި، އަހްމަދު ސަލީމް (މާޒް ސަލީމް) އަރައިގަތް ކަމަށް ފެމިލީ ކޯޓުން މިއަދު ހުކުމްކޮށްފިއެވެ.
ފެމިލީ ކޯޓުން މިއަދު ކުރި ހުކުމްގައި ވަނީ އުމައިރަށް ގާނޫނުއަސާސީންނާއި، ރާއްޖެ ބައިވެރިވެފައިވާ ކުޑަކުދިންގެ ރައްކާތެރިކަމުގެ ބައިނަލްއަގްވާމީ މުއާހަދާއިން، ކުޑަކުއްޖެއްގެ ހައިސިއްޔަތުން ލިބިދީފައިވާ ކަރާމާތާއި ރައްކާތެރިކަން ނަގާލާފައިވާ ކަމަށް ނިންމާފައެވެ. އަދި މި މައްސަލައިގައި މަންދީ އާއި މާޒް ސަލީމް ދެއްކި ވާހަކަތަކަށާއި އެ ވާހަކަތަކުގެ ނަތީޖާއަށް، އެއްވުން ބޭއްވި އެމްޑީޕީގެ ޗެއާޕާސަންގެ ހައިސިއްޔަތުން ފައްޔާޒް އިސްމާއީލް ޒިންމާ ނަންގަވަން ޖެހޭނެ ކަމަށްވެސް ކޯޓުގެ ހުކުމުގައި ބަޔާންކޮށްފައިވެއެވެ.
މީގެ އިތުރުން، މަންދީ އާއި ސަލީމް ދެއްކި ވާހަކަތައް މަނާކުރުމުގެ ބަދަލުގައި އެ ވާހަކަތަކަށް ފައްޔާޒު ހިތްވަރުދީފައިވާކަން ކޯޓުގައި ސާބިތުވާ ކަމަށް ހުކުމްގައި ފާހަގަކޮށްފައިވެއެވެ. މި ހުކުމުން ރައީސްގެ އަނބިކަނބަލުން ސާޖިދާއަށް، މަންދީ އާއި، އެމްޑީޕީ އާއި، ފައްޔާޒުގެ ފަރާތުން ގެއްލުމުގެ ބަދަލު ހޯދުމުގެ ހައްގު ލިބިވަޑައިގަންނަވާ ކަމަށް ވެސް ފެމިލީ ކޯޓުން ވަނީ ނިންމާފައެވެ.
މިކަމާ ބެހޭގޮތުން ރައީސްގެ އާއިލާގެ ގާނޫނީ ވަކީލު އަދި ކުރީގެ ބަންޑާރަނައިބު އައިޝަތު އާޒިމާ ޝަކޫރު ވިދާޅުވީ، މިއީ ސިޔާސީ ހަނގާކުރުމާއި ހަމަލާތަކުން ކުޑަކުދިން ރައްކާތެރިކުރުމަށް ކުރި ދައުވާއެއް ކަމަށާއި، އެހެންކަމުން ބަދަލު ހޯދުމަށް ހުށަނާޅުއްވާނެ ކަމަށެވެ.
މި މައްސަލައާ ގުޅިގެން ސާޖިދާ ސިވިލް ކޯޓުގައި ވެސް ދައުވާކުރި އިރު، މަންދީގެ ވާހަކަތަކުގެ ސަބަބުން ރައީސްގެ ދަރިކަލުންގެ އަބުރު ގެއްލުނުކަން ސާބިތުވާކަމަށް، ޖުލައި 20 ވަނަ ދުވަހު ސިވިލް ކޯޓުން ވެސް ވަނީ ހުކުމްކޮށްފައެވެ.