ރައީސް އިބްރާހީމް މުޙައްމަދުގެ ސަރުކާރުގެ “ގެދޮރުވެރިޔާ” ސްކީމްގެ ދަށުން ޙައްޤު ގޮތުގައި ފުލެޓު ލިބުނު ފަރާތްތަކުގެ އަތުން މި ސަރުކާރުން ފުލެޓުތައް އަތުލަމުންދާތީ، އަދި ގުރުއަތުން ލިބިފައިވާ ފުލެޓުތައް ވެސް މިސަރުކާރުން އަތުލާފައިވާތީ، ރައްޔިތުންގެ މެދުގައި ސަރުކާރަށް ނުރުހުން ބޮޑުވެއްޖެއެވެ. މި ކަމާއި ގުޅިގެން ގިނަ ބަޔަކު ސަރުކާރަށް ފާޑުކިޔުންތައް އަމާޒުކުރަމުން އަންނަ އިރު، ފްލެޓަށް އެދި ކުރިމަތިލާފައިވާ ފަރާތްތަކުގެ ހިތްތަކުގައި ބޮޑު ކަންބޮޑުވުމެއް ވަނީ އުފެދިފައެވެ.
ފަހި ދިރިއުޅުން ކޯޕަރޭޝަން (އެފްޑީސީ)ގެ މެނޭޖިން ޑިރެކްޓަރ ހަމްދާން ޝަކީލު ވިދާޅުވީ، ގެދޮރުވެރިޔާ ސްކީމްގެ ދަށުން ފްލެޓު އެއްބަސްވުމުގައި މިހާތަނަށް 3،000 އަށްވުރެ ގިނަ މީހުން ސޮއިކޮށްފައިވާ ކަމަށާއި، އޭގެ ތެރެއިން 588 މީހުން ސެކިއުރިޓީ ޑިޕޮސިޓް ދައްކާފައިވާ ކަމަށެވެ. މީގެ ކުރިން ބައެއް ފަރާތްތަކަށް ލިބުނު ފްލެޓުތައް މި ސަރުކާރުން ނުހައްޤުން އަތުލަމުންދާ ކަމުގެ ޝަކުވާތައް ބޮޑުވެފައިވާއިރު، މިކަންކަން މިހެން ހިނގަމުންދާތީ ރައްޔިތުންގެ ކަންބޮޑުވުން ވަނީ އިތުރުވެފައެވެ.
އެފްޑީސީން ހުޅުމާލޭގެ ދެވަނަ ފިޔަވަހީގައި ތަރައްޤީކުރާ 4،000 ފްލެޓުގެ އެއްބަސްވުންތައް އެކުލަވާލުމުގެ މަސައްކަތް ފެށީ މިދިޔަ ޖުލައި މަހުގެ 21 ވަނަ ދުވަހުއެވެ. ސަރުކާރު ބަންދު ނޫން ހުރިހާ ދުވަހެއްގައި އެއްބަސްވުމުގައި ސޮއިކުރުމުގެ މަސައްކަތް އެފްޑީސީން ދަނީ ކުރަމުންނެވެ. ޕީއެސްއެމް ނިއުސްއަށް މަޢުލޫމާތު ދެއްވަމުން އެފްޑީސީގެ މެނޭޖިން ޑިރެކްޓަރ ހަމްދާން ޝަކީލު ވިދާޅުވީ، މިހާތަނަށް 3،131 އެއްބަސްވުމެއްގައި ސޮއިކުރަން ތާވަލުކޮށްފައިވާ ކަމަށެވެ. އަދި 3،119 އެއްބަސްވުމެއްގައި ސޮއިކޮށް ނިމިފައިވާކަމަށް އޭނާ ވިދާޅުވިއެވެ. މީގެ އިތުރުން 588 މީހަކު ސެކިއުރިޓީ ޑިޕޮސިޓާއި، މެއިންޓަނެންސް ފީ ދައްކާފައިވާކަމަށްވެސް ހަމްދާން ވިދާޅުވިއެވެ. މި ފީ ދެއްކުމަށް ވަކި މުއްދަތެއް ކަނޑައަޅާފައެއް ނުވެއެވެ. މިއީ ސީދާ ވަކި ބައެއްގެ ހައގުތަކަށް އަރައިގަނެ ކޮށްފައިވާ ކަމެއް ކަމަށް ފެންނާން އެބައޮތެވެ. ބަޔަކަށް ލިބިފައިވާ ފުލެޓިތަކެއް އެއްވެސް ސަރވޭ އެއް ކުރުމެއް ނެތި ތިމާ ބޭނުންހާ ގޮތަކަށް ބޭނުންވާ ބަޔަކަށް މިސަރުކާރުން ދިނުމަކީ ނާޖާއިޒު މަންފާތަކެއް ސަރުކާރުގެ ވެރިން ނެގުމަށް ކުރަމުންދާ ވިޔާނުދާ އަދި ވަރަށް ހަޑި މުޑުދާރު އަމަލެއް ކަމަށް އެއްބަޔަކު ގަބޫލުކުރެއެވެ. ސަބަބަކީ އެމީހުންގެ ދިރިއުޅުމުގެ ހާލަތަށް ބަލައި ފުރާފައިވާ ފޯމުން ލިބުނު ފުލެޓް މިސަރުކާރުން އނިގުޅައިގަނެފައި ވާތީއެވެ.
ޕޮއިންޓުގެ ގޮތުން ބަލާފައި ކުރީ ސަރުކާރުގެ ގުރުއަތުން ލިބުނު ފުލެޓުތައް މި ސަރުކާރުން އަތުލައިގަތުމަކީ ބަލައިގަނެވޭނެ ކަމެއް ނޫން. އެއީ މި ސަރުކާރުން ހިންގި ޖަރީމާއެއް ކަމަށް ބެލެވޭ. އެކަމަކަށް މަޢާފެއް ނުކުރެވޭނެ! މީހެއްގެ ޙައްޤަކަށް ނާރާނަމޭ ކިޔައި ، ޙައްޤު ގޮތުގައި ލިބުނު ފުލެޓުތައް މި ސަރުކާރުން ނިގުޅައިގަނެފި ކަމުގެ ހެކި އެބަހުރި!
އެފްޑީސީން ދެ ކުންފުންޏަކާއި ހަވާލުކޮށްގެން ހުޅުމާލޭގެ ދެވަނަ ފިޔަވަހީގައި ތަރައްޤީކުރަމުންދަނީ ދެ ކޮޓަރީގެ ފްލެޓާއި ތިން ކޮޓަރީގެ ފްލެޓުތަކެކެވެ. ދެ ކޮޓަރީގެ އެޕާޓްމަންޓުތައް ދޫކުރަނީ ކުއްޔަށް 7،000 ރުފިޔާއަށެވެ. އެ ތަންތަނުގެ މެއިންޓަނެންސް ފީގެ ގޮތުގައި 1،000 ރުފިޔާ އަދި ސެކިއުރިޓީ ޑިޕޮސިޓް ފީގެ ގޮތުގައި 15،000 ރުފިޔާ ދައްކަންޖެހެއެވެ. އަދި ތިން ކޮޓަރީގެ ތަންތަން 9،500 ރުފިޔާއަށް ދޫކުރަން ނިންމާފައިވާއިރު، އެ ތަންތަނަށް މެއިންޓެނަންސް ފީގެ ގޮތުގައި 1،500 ރުފިޔާ އަދި ސެކިއުރިޓީ ޑިޕޮސިޓް ފީގެ ގޮތުގައި 25،000 ރުފިޔާ ދައްކަންޖެހެއެވެ.
މި 4،000 ފްލެޓު ތަރައްޤީކުރުމުގެ މަޝްރޫޢުގައި ހިމެނެނީ އަމާން ހިޔާގެ 6 ޓަވަރާއި އަމާން ދޯދީގެ 6 ޓަވަރެވެ. އޭގެތެރޭގައި 2800 ހައުސިން ޔުނިޓަކީ 3 ކޮޓަރީގެ އެޕާޓްމަންޓެވެ. މި އެޕާޓްމަންޓްތައް ހަވާލުކުރަނީ ފިނިޝިން މަސައްކަތްތައް ނިންމުމަށްފަހުއެވެ.
މި މަޝްރޫޢުގެ ދަށުން ހަދާ “ދޯދި ޓަވަރު” އަދި “އުދަރެސް ޓަވަރު”ތަކުގައިވެސް ސްޓްރަކްޗަރަލް ހުރިހާ މަސައްކަތެއް މިހާރު ވަނީ ނިންމާފައެވެ. އަދި ހުރިހާ ޓަވަރުތަކުގައިވެސް ކުރިއަށްދަނީ ފިނިޝިން މަސައްކަތްތަކެވެ. ޢިމާރާތުގެ ގާތްގަނޑަކަށް 80 އިންސައްތަ މަސައްކަތް ނިމިފައިވަނީ އުދަރެސް ޓަވަރުތަކުގެއެވެ. އަދި ދޯދި ޓަވަރުތަކުގެ މަސައްކަތުގެ 86 އިންސައްތަ ނިމިފައިވާކަމަށް އެފްޑީސީން މަޢުލޫމާތުދެއެވެ. މި މަޝްރޫޢުތައް މިހާރު ކުރިއަށްދާ ނަމަވެސް، ފްލެޓު ލިބުނު ފަރާތްތަކުގެ އަތުން ފްލެޓު އަތުލުމުގެ ސަބަބުން ރައްޔިތުންގެ އިތުބާރު ސަރުކާރަށް ގެއްލިފައިވާކަން ފާހަގަކުރެވެއެވެ.
