ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މާލޭގެ ބޮޑުތަކުރުފާނު މަގުގެ އުތުރު ފަރާތުން ކުރިއަށްދާ މަގު ފުޅާކުރުމާއި ތަރައްޤީކުރުމުގެ މަޝްރޫޢުގެ ޢަމަލީ މަސައްކަތް ހިނގާގޮތް މިއަދު ބައްލަވާލައްވައިފިއެވެ. މިއީ މާލޭގެ މައި މަގެއް ޒަމާނީ ފެންވަރަށް، ހަތަރު ލޭނަށް ތަރައްޤީކުރުމަށް ސަރުކާރުން އިސްކަންދެއްވާ މަޝްރޫޢެކެވެ.
މި މަޝްރޫޢު ފެށުމަށް ރައީސުލްޖުމްހޫރިއްޔާ އިޢުލާން ކުރެއްވީ ޢިއްޒުއްދީން ފާލަން އަލުން ތަރައްޤީކޮށް ނިންމައި އިފްތިތާޙްކުރުމުގެ ރަސްމިއްޔާތުގައެވެ. މަގު ހަތަރު ލޭނަށް ފުޅާކޮށް ޒަމާނީ ފެންވަރަށް ތަރައްޤީކުރުމުގެ ޢަމަލީ މަސައްކަތް މާލެ އުތުރުފަރާތުން ފަށާފައިވަނީ މިދިޔަ މަހުގެ 21 ވަނަ ދުވަހުއެވެ.
ރައީސުލްޖުމްހޫރިއްޔާ މި މަޝްރޫޢުގެ މަސައްކަތް ބައްލަވާލެއްވުމަށް ވަޑައިގަތީ، އެމް.އެމް.އޭ ސަރަހައްދުގައި މަގު ތަރައްޤީ ކުރުމަށް ކަނޑައަޅާފައިވާ ސައިޓަށެވެ. އެ ސަރަހައްދަށް އެމަނިކުފާނު ވަޑައިގަތުމުން މަރުހަބާ ދެންނެވީ އިމާރާތްކުރުމާއި ގެދޮރުވެރިކަމާއި ބިނާރާބެހޭ ވަޒީރު ޑރ. ޢަބްދުﷲ މުއްޠަލިބްއާއި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ)ގެ މެނޭޖިންގ ޑިރެކްޓަރ އަޙްމަދު ސަޢުދީއެވެ.
މި މަޝްރޫޢުގެ ފުރަތަމަ ފިޔަވަހީގައި ޝީޓްޕައިލްކޮށް އިންސްޓޯލް ކުރުމުގެ ހުރިހާ މަސައްކަތެއް ވަނީ ނިންމާފައެވެ. އަދި ބިން ހިއްކުމުގެ 82 އިންސައްތަ މަސައްކަތްވެސް މިހާތަނަށް ނިމިފައިވާކަމަށް އެމްޓީސީސީން ބުނެއެވެ. އެމްޓީސީސީގެ ސީނިއަރ ޕްރޮޖެކްޓް މެނޭޖަރ ޝަރުވަޒް އަބްދުﷲ ފާއިޒް ވިދާޅުވީ، ހިއްކުމުގެ މަސައްކަތް މާދަމާގެ ނިޔަލަށް ނިންމާލެވޭނެ ކަމަށެވެ. އަދި އޮކްޓޫބަރު 13 ގެ ނިޔަލަށް މިހާރު ކުރިއަށްދާ މަސައްކަތްތައް ނިންމާލުމަކީ ޓާގެޓެއްކަމަށް އޭނާ ވިދާޅުވިއެވެ. މަޝްރޫޢުގެ ފުރަތަމަ ސެގްމަންޓް އަންނަ ރަމަޟާން މަސް ފެށުމުގެ ކުރިން ނިންމައި އާންމުނަށް ހުޅުވާލުމަށް އެމްޓީސީސީން ދަނީ މަސައްކަތް ކުރަމުންނެވެ.
ދައުލަތުގެ ބަޖެޓުން ޚަރަދުކޮށްގެން، ޢިމާރަތްކުރުމާއި ގެދޮރުވެރިކަމާއި ބިނާރާ ބެހޭ ވުޒާރާއިން އެމްޓީސީސީއާ ޙަވާލުކޮށްފައިވާ މިމަޝްރޫޢުގެ ދަށުން ބޮޑުތަކުރުފާނު މަގު ތަރައްޤީކުރުމަށް ހަމަޖެހިފައިވަނީ 3 ސެގްމަންޓަކަށް ބަހާލައިގެންނެވެ. މާލެ މާރުކޭޓު ސަރަޙައްދުން ފެށިގެން ހެންވޭރު ފެރީ ޓަރމިނަލްއާ ހަމައަށް ހިމެނޭ 830 މީޓަރުގެ ސަރަޙައްދު (އޭގެ ތެރެއިން 737 މީޓަރުގައި އެއްގަމު ތޮށީގެ މަސައްކަތް) ތަރައްޤީކުރުމަށް އެމްޓީސީސީއާ ހަވާލުކޮށްފައިވަނީ 144 މިލިޔަން ރުފިޔާއަށެވެ.
ބޮޑުތަކުރުފާނު މަގު ތަރައްޤީވެ ނިމޭއިރު، ދުއްވާ މީހުންނަށް 4 ލޭނާއި ހިނގާ މީހުންނަށް ޚާއްސަ ސަރަޙައްދެއް ހިމެނޭނެއެވެ. މިއީ މާލޭގައި އެންމެ ކާރުބާރުބޮޑު ސަރަޙައްދަކަށްވުމުގެ އިތުރުން މާލެއަށް އަރައި ފައިބާ މީހުން ބޭނުންކުރާ މައި ބަނދަރާއި ގިނަ އޮފީސްތައްވެސް ހިމެނޭ ސަރަޙައްދެކެވެ.
