ވެސްޓަން ޑިމޮކްރަސީގައި ގިނަބަޔަކަށް ފެންނަ ނަމަ މަނާ ކަމެއް ނޯވެއެވެ. އެހެން ނަމަވެސް އިސްލާމީ ޖުމްހޫރީ ވެރިކަމެއްގައި ގިނަބަޔަކަށް ކަމެއް ކުރުމަށް ފެނުނަސް ގެއްލުން ހުރިކަމެއް، އަޚުލާޤުން ބޭރުވާ ފަދަކަމެއް ކުރުން ހުއްދަވެގެންނެއް ނުވެއެވެ. އިސްލާމީ ޖުމުހޫރީ ނިޒާމުގައި މަޝްވަރާކުރުމަށް އޮވެއެވެ.
އެހެން ނަމަވެސް މަޝްވަރާ ކުރުމުގައި އިސްކުރަން ޖެހެނީ ޢިލްމުވެރިންގެ ބަހެވެ. ރައްޔިތުންގެ ތެރެއިން ނުވަތަ ގިނަބައެއްގެ ތެރެއިން ޢައްޔަނުކުރެވޭ ޢިލްމީ މީހުންގެ މައްޗަށް އެކުލެވޭ ބައެއްގެ މަޝްވަރާއެވެ. އެބޭކަލުންނަކީ ޝަރްޢީ، ދީނީ އަދި ދުނިޔެވީ އިލްމުތައް ދެނެލައްވާ ފުންނާބު އުސް މުފައްކިރުން ކަމުގައި ވާންޖެހެއެވެ.
އެހެނެއްކަމަކު، މިހާރު ދުނިޔޭގައި ވައި ހިފާފައިވާ ވެސްޓަން ޑިމޮކްރަސީގައި ގޮތް ނިންމުމަށް ލަފާ ހޯދަނީ މިގޮތަކަށް ނޫނެވެ. ވެސްޓަން ޑިމޮކްރަސީގައި މަޤާމަކަށް އައުމަށް ތަޢުލީމީ ޝަރުޠެއް މުހިއްމެއް ނޫނެވެ.
ނަމަވެސް އިސްލާމް ދީނުގައި ދަންނަ މީހުންނާއި ނުދަން މީހުން އެއްވަރެއް ނުވެއެވެ. އެހެނެއްކަމަކު ހުރިހާ އިންސާނުންނަކީ ވެސް އިންޞާފުގެ ކުރިމަތީގަ އާއި ޙައްޤުތައް ހަމަހަމަ ބައެކެވެ. ﷲ ގެ ވަޙީ ބަސްފުޅުން އެނގޭ އެއްޗަކީ ދުނިޔޭގައި މިހާރު މިއޮތް ވެސްޓަން ޑިމޮކްރަސީގެ މިންގަނޑުން ޢަޤުލަބިއްޔަތު ބޭނުންވާ ގޮތަަކަށް ކަންކަން ނިންމާ ނަމަ މަގުފުރެދިދާނެ ކަމެވެ. އެހެނީ ކޮންމެ ޤައުމެއްގައިވެސް ގިނަ ވަނީ ނުދަންނަ މީހުންކަމަށްވާތީއެވެ.
އިސްލާމް ދީނުގައި ގިނަބަޔަކު ބޭނުންވިޔަސް ޙަރާމް ކަންކަން ހުއްދައެއް ނުކުރެވޭނެއެވެ. މިސާލަކަށް ހުޅަނގުގެ ޑިމޮކްރަސީގައި މެޖޯރިޓީ އަށް ތަބާވުމަށް އެއްޖިންސުން ގުޅުމެއް ހިންގުން ހުއްދައެވެ. ޒިނޭ ކުރުން ހުއްދައެވެ.
އިސްލާމްދީނުގައި މިއީ ހުއްދަ ކަންތަކެއް ނޫނެވެ. އަމާނާތަށް ޚިޔާނާތްތެރި އެއް ނުވެވޭނެއެވެ. ވައުދުތަކާއި އަހުދު ތައް އުވާލުމަކީ ފާފަވެރިވާނެ ކަމެކެވެ.
قوله تعالي : وَإِن تُطِعْ أَكْثَرَ مَن فِي الْأَرْضِ يُضِلُّوكَ عَن سَبِيلِ اللَّهِ ۚ إِن يَتَّبِعُونَ إِلَّا الظَّنَّ وَإِنْ هُمْ إِلَّا يَخْرُصُونَ (سورة ألأحزاب آية 116)
އަދި ބިމުގައިވާ ގިނަ މީހުންނަށް ކަލޭގެފާނު ކިޔަމަންވެ ވަޑައިގެންފިނަމަ، އެއުރެން اللَّه ގެ މަގުން ކަލޭގެފާނު އެއްކިބާކޮށް މަގު ފުރައްދައިފާނެތެވެ. އެއުރެން ހީއަކަށް ނޫނީ تبع އެއް ނުވެތެވެ. އަދި ދޮގުހަދާ ބަޔަކު ކަމުގައި މެނުވީ، އެއުރެން ނުވެތެވެ. (116)
