ރޭ ކުޅުނު ޔޫއެފާ ޗެމްޕިއަންސް ލީގުގައި ފްރާންސްގެ އޮލިމްޕިކް މާސޭ އަތުން 2-1 ގެ ނަތީޖާއަކުން ރެއާލް މެޑްރިޑް މޮޅުވެ، މުބާރާތުގައި އިތުރު ތިން ޕޮއިންޓް ހޯދައިފިއެވެ. މި މެޗު ކުޅުނީ މެޑްރިޑްގައި ހުންނަ ރެއާލް މެޑްރިޑްގެ އަމިއްލަ ދަނޑު، ސެންޓިއާގޯ ބަރނަބިއު ސްޓޭޑިއަމްގައެވެ.
މެޗުގެ ފެށުން ރެއާލް މެޑްރިޑަށް ރަނގަޅު ގޮތަކަށް ނުފެށުނެވެ. މެޗުގެ ތިންވަނަ މިނިޓުގައި ޓީމުގެ މުހިންމު ކުޅުންތެރިއެއް ކަމަށްވާ ޓްރެންޓް އެލެކްޒެންޑަރ އާނޯލްޑް އަށް އަނިޔާވެ، އޭނާއަށް ޖެހުނީ ދަނޑުން ފައިބާށެވެ. އާނޯލްޑްގެ ބަދަލުގައި ދަނޑަށް ނިކުތީ ތަޖުރިބާކާރު ޑެނީ ކަރްވަހާލްއެވެ.
ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެންދިޔަ މި މެޗުގެ ފުރަތަމަ ލަނޑު ޖަހާ ކުރި ހޯދީ މާސޭއެވެ. މެޗުގެ 22 ވަނަ މިނިޓުގައި ރެއާލް މެޑްރިޑްގެ ތުރްކިޔޭގެ އާޑާ ގުލާ އަތުން ބޯޅަ ހޯދުމަށްފަހު މޭސަން ގްރީންވުޑް ދިން ރީތި ބޯޅައަކުން، ކީޕަރު ކޯޓުއާ ކައިރިން ބޯޅަ ނައްޓާލުމަށްފަހު ޓިމޮތީ ވެއާ ވަނީ ގޯލުގެ ތެރެއަށް ބޯޅަ ފޮނުވާލައިފައެވެ.
ނަމަވެސް މާ ގިނައިރުތަކެއް ނުވެ ރެއާލް މެޑްރިޑުން ވަނީ ނަތީޖާ ހަމަހަމަ ކޮށްފައެވެ. މާސޭގެ ލަނޑަށްފަހު ހަ މިނިޓު ތެރޭގައި، ރޮޑްރިގޯ އަށް އޭރިޔާ ތެރެއިން ކުރި ފައުލަކާއި ގުޅިގެން ރެއާލް މެޑްރިޑަށް ލިބުނު ޕެނަލްޓީއެއް ކިލިއަން އެމްބާޕޭ ފޮނުވައލީ ގޯލުގެ ތެރެއަށެވެ.
މެޗުގެ ދެވަނަ ހާފުގައި ރެއާލް މެޑްރިޑަށް އިތުރު ގޮންޖެހުމެއް ކުރިމަތިވިއެވެ. މާސޭގެ ގޯލުކީޕަރަށް ހަމަލާ ދިނުމާއި ގުޅިގެން ޑެނީ ކަރްވަހާލް އަށް ރެފްރީ ވަނީ ރަތް ކާޑު ދައްކާ ދަނޑުން ފޮނުވާލާފައެވެ. މިކަމުގެ ސަބަބުން މެޗުގެ ފަހު 18 މިނިޓު ރެއާލް މެޑްރިޑުން ކުޅެފައިވަނީ އެއް ކުޅުންތެރިއަކު މަދުކޮށެވެ.
ޗެމްޕިއަންސް ލީގުގެ ތާރީހުގައި 15 ފަހަރު މަތިން މި ތަށި އުފުލާލާފައިވާ ރެއާލް މެޑްރިޑުން މެޗުން މޮޅުވެފައިވަނީ، މެޗުގެ ފުރިހަމަ ވަގުތު ހަމަވާން ނުވަ މިނިޓަށް ވެފައިވަނިކޮށެވެ. މިއީ ޓީމަށް ލިބުނު ދެވަނަ ޕެނަލްޓީއެކެވެ. ވިނިޝިއަސް ޖޫނިއަރ ނަގައިދިން ހުރަހެއްގައި، އޭރިޔާ ތެރޭގައި ހުރެ މާސޭގެ ފަކުންޑޯ މެޑީނާ ބޯޅައިގައި އަތްލުމުގެ ސަބަބުން ރެފްރީ ދިން މި ޕެނަލްޓީވެސް ގޯލުގެ ތެރެއަށް ފޮނުވާލީ ކިލިއަން އެމްބާޕޭއެވެ.
މި މެޗުގައި އެމްބާޕޭ ޖެހި ދެ ލަނޑާއެކު މި ސީޒަނުގައި އޭނާ ކުޅުނު ފަސް މެޗުގައި ޖެހި ލަނޑުގެ އަދަދު ވަނީ ހަޔަކަށް އަރާފައެވެ. މި ނަތީޖާއާއެކު ރެއާލް މެޑްރިޑް ވަނީ ޗެމްޕިއަންސް ލީގުގައި ދެވަނަ ބުރުގެ ދަތުރު ފަށާފައެވެ.
