ދިވެހި ޕްރިމިއަރ ލީގުގައި 1-0 ލަނޑުން ކްލަބް ވެލެންސިއާ ބަލިކޮށް ކްލަބް ގްރީން ސްޓްރީޓްސް މޮޅުވެ ލީގުގައި ކުޅުނު 11 މެޗުން ހޯދި 8 ޕޮއިންޓާ އެކު ތާވަލުގެ 7 ވަނަ އަށް ކުރިއަށް ޖެހިލައިފިއެވެ.
ލީގުގެ ފުރަތަމަ ބުރުގައި މި ދެޓީމު ކުޅުނު މެޗު ކާމިޔާބު ކުރީ 2-1 ލަނޑުން ވެލެންސިއާ އެވެ. މިރޭގެ މެޗު ކާމިޔާބު ކުރުމާއެކު މިއީ ލިގުގައި ގްރީން ހޯދި ދެވަނަ މޮޅެވެ.
މާޒިޔާ އަތުން ޕޮއިންޓެއް ހޯދި ޓީސީ އޮތީ 11 މެޗުން ލިބުނު 6 ޕޮއިންޓާ އެކު ޓޭބަލުގެ ފުލުގައެވެ.
ގަލޮލު ރަސްމީ ސްޓޭޑިއަމްގައި ކުޅުނު މި މެޗުގައި ފެނުނު ހަމައެކަނި ލަނޑަކީ 10 ވަނަ މިނިޓުގައި ގްރީންގެ އިރާގު ފޯވާޑް އޮބައިދާ ކަދުމް ނަގައިދިން ބޯޅައެއް އޭރިއާ ތެރެއިން މިސްރުގެ އެލް ސައީދު އަބްދުލްފައްތާހު ގޯލަށް ވެއްދި ބޯޅައެވެ.
މެޗުގެ އިތުރު ވަގުތު ތެރޭގައި ގްރީންގެ ހުޒާމް ހަމީދަށް ރީތި ފުރުސަތެއްލިބުނެވެ. ނަމަވެސް އޭރިއާ ތެރެއިން ހުސްކޮށް ހުރެ ފޮނުވާލި ބޯޅަ ދިޔައީ ހުރަސް ދަނޑިމަތިންނެވެ.
