ޣައްޒާ މަންމައެއްގެ ރުއިމާއި އާދޭސް! 

އެއީ ހަނގުރާމައިގެ ސަބަބުން ސުންނާފަތިވެގެން ގޮސްފައިވާ، ދުނިޔޭގައި އުއްމީދު ފުނޑުފުނޑުވެފައިވާ  ޣައްޒާގެ މަންމައެއް ކަމަށްވާ ޔާސްމީނެވެ.  ޒުވާން މަންމައެކެވެ.

 ޔަހޫދީންގެ ވަޒަންތަކާއި، އުންޑަތަކާއި، އަލިފާނުގެ ބޮންތަކުން ސަކާމަތްކުރުމަށް ޔާސްމިން ތާއަބަދު ލޮލުފިިޔަ ޖަހާނުލައި އިންނަނީ އޭނާގެ 4 މަހުގެ ތުއްތު އަންހެން ކުއްޖާ އައިލާ އަށްޓަކައެވެ.  2023 ވަނަ އަހަރުގެ އޮކްޓޯބަރު މަހުގެ ކުރީކޮޅު އުފަންވި އައިލާއަށް ބިރުވެރިކަމާއި ބަނޑުހައިހޫނުކަމާއި ފަނާވެފައިވާ ޣައްޒާގެ ފިނި ހިމޭންކަން ނޫން އެހެން އެއްޗެއް އެނގިފައެއް ނުވެއެވެ.

މިއަދު އުމުރުން އެންމެ 25 އަހަރުގެ ޔާސްމީނަށް “މަންމައެއްގެ ލަޤަބު” އެނގިފައިވަނީ  ކޮންމެ ދުވަހަކު ވެސް ބަޔާން ނުކުރެވޭ ދަތިތަކާއި ދެކޮޅަށް ހަނގުރާމަކުރާ ހަނގުރާމަވެރިއެއްގެ ގޮތުގައެވެ. އެހެނަސް އޭނާގެ އަތުގައި  ބަޑިއެއް ނެތެވެ. ބޮމެއ ، ޓޭންކަރެއ  ނެތެވެ. އެތަކެއްތިން މިއަދު ވަނީ އޭނާ ވަށާލާފައެވެ. ހުރިހާ ފަރާތަކުންނެވެ.

އެހެނަސް، އޭނާގެ ހުވަފެނަކީ ސާދާ ހުވަފެނެކެވެ. އަންހެން ދަރިފުޅު ލޯތްބާއެކު ތަރުބިއްޔަތު ކުރުމާއި، ގާތުންދިނުމާއި، ފަރުވާތެރިކަމާއެކު ތަރުބިއްޔަތު ކުރުމެވެ. އެކަމަކު ޔަހޫދީން ވަނީ މި އަސާސީ ހުވަފެންތައް ވެސް ޔާސްމީނު އަތުން ވަގަށް ނަގާފައެވެ.

“އަހަރެން މަސައްކަތް ކުރަނީ ގާތުން ކިރުދޭން” ޔާސްމީން ބުންޏެވެ، “އެކަމަކު އަހަރެން ވަރަށް ބަލިކަށިވެއްޖެ. އަހަރެންނަށް ކިރިޔާ  ދުވާލަކު އެއްފަހަރު ކާން ވެސް ލިބެނީ.” ކާނާ ލިބުން ދަތިވެ ބަނޑަށްޖެހިފައިވުމާއި، ސްޓްރެސް އާއި، ކެތްތެރިކަމެއް ނެތް ބިރުވެރިކަމުގެ ސަބަބުން އޭނާގެ ބާރު ފޭރިގަނެފައިވާ އުމުރުން 25 އަހަރުގެ ޔާސްމީނާއި ބެހޭގޮތުން ފޮނުވި ޑޮކިއުމެންޓަރީއެއްގައި ޔާސްމީނު ބުނި ކަމަށް ރިޕޯޓަރު އިނގިރޭސީން ބުނި އަޑު އަހުރެން އެހީމެވެ.

މަންމަމެންގެ ދުވަސް މިއަދު ފާހަގަކުރާއިރު ޔާސްމީނަކަށް ގާތުންވެސް ނުދެވެއެވެ. އޭނާގެ ހަށިގަނޑުން ދަރިފުޅު އައިލާއަށް ފައިބާން ހުންނަ ޤުދުރަތީ ކާނާ ވަނީ  ހިކިފައެވެ. އެހެންކަމުން ދެން މިޖެހެނީ ފޯމިއުލާއަށް އެނބުރޭށެވެ. އެކަމަކު އޭގެ ކުޑަ ދަޅެއް ވެސް މި ލިބެނީ 6  ޑޮލަރަށެވެ.  އޭނާގެ އަތުގައި އެ ފޯމިއުލާ ދަޅު ގަންނާނެ ފައިސާއެއް ނެތެވެ.

ހުރިހާ އެއްޗެއްގެ ތެރެއިން އެންމެ މުހިންމު ބޭނުން ކަމަށްވާ ފެނަކީ މިއަދު ޣައްޒާގެ މަދު ބަޔަކަށް ނޫނީ ނުލިބޭނެ ޚަޒާނާއެކެވެ. ކޮންމެ ދުވަހަކުވެސް ޔާސްމީންގެ ފިރިމީހާ އިރުއެރުމުގެ ކުރިން ނުކުމެގެން ދަނީ ބޮންތަކުން ފުނޑުފުނޑުވެފައިވާ ޣައްޒާއިން ނުކުމެ ފެންފޮދެއް ހޯދާށެވެ. އޭނާ އެނބުރި އަންނަނީ ކިރިޔާ ބޭނުންކުރެވޭ ވަރަށް ލޮނު ގަދަ ފެން ހިފައިގެންނެވެ. ކައްކަނީ އެ ފެނުންނެވެ. ބޮނީ އެ ފެނެވެ. ލޮނުކަން ގަދަ ފެނެވެ. އެ ބޮއެފައި ރުއިން ނޫން ކަމެއް ނެތެވެ.

ޔާސްމީންގެ ފިރިމީހާ އުޅެނީ ބަޒީފާގައެއް ނޫނެވެ. ޢާމްދަނީ ލިބެން ނެތް މަސައްކަތަކަށް އޮންނާނީ ކޮން ވަޒީފާއެއް ހެއްޔެވެ؟  ވަޒީފާ

އެމީހުން އުޅެނީ މެދުނުކެނޑި ބިރުވެރިކަމުގެ ތެރޭގައެވެ. ކޮންމެ ރެއަކުވެސް ބޮމުގެ އަޑާއި އެކު މުޅި ސަރަޙައްދު ހީވަނީ ފުނޑުފުނޑުވެގެން އުޑު ވެސް ބޯމައްޗަށް ވެއްޓޭހެންނެވެ.  ބިއްލޫރިތައް ދަނީ ތަޅަތަޅައިގެންނެވެ. ފާރުތަކުގައި ދަނީ ރެނދުލަމުންނެވެ. ޔާސްމީނަށް ކުރެވޭހާވެސް ކަމަކީ ބުރައިގެންދާ ގާކޮޅުތަކާއި ކުނޑިތަކާއި އެތިއެތިކޮޅުތައް ދަރިފުޅު އައިލާގެ ގައިގައި ޖެހި އެފަކީރު މަރުވެދާނެތީވެ ޝީލްޑަކަށް ނުވަތަ އައްޑަނަޔަކަށް ވެގެން ހުރެ އެކުއްޖާ ސަލާމަތްކުރުމެވެ.

ޣައްޒާގައި ކޮންމެ ދުވަހަކު ގާތްގަނޑަކަށް 180 އަންހެނުން ވިހާއިރު އެ މަންމަމެންނަށް ހޮސްޕިޓަލުން ދޭނެ ބޭހެއް ނެތެވެ. ބޭސް ހުސްވެއްޖެއެވެ.  ޔާސްމީން ފަދައިން މަންމަމެންތައް ދިރިއުޅެނީ އެމީހުން ވިހެއި  ކުދިކުދި ފުރާނަތައް ހިމާޔަތް ކުރުމުގައި އަވަދިނެތިއެވެ.