މި މަހުގެ 18 ވަނަ ދުވަހު މާލޭގެ ގެއެއްގެ ފުރާޅުމަތީގައި ދިވެހި ޒުވާނަކު ވެއްޓިފައި އޮއްވައި ފެނުނު މައްސަލައާ ގުޅިގެން ރައީސުލްޖުމްހޫރިއްޔާ ޑރ. މުޙައްމަދު މުއިއްޒު އުފެއްދެވި، “2025 އެޕްރީލް 18 ވަނަ ދުވަހު މާލޭގައި ހިނގި ހާދިސާ ތަޙުޤީޤުކުރާ، ރައީސުލްޖުމްހޫރިއްޔާގެ ޚާއްޞަ ކޮމިޝަން” އަށް ބަދަލުތަކެއް ގެނެސްފިއެވެ.
ރައީސް މި ކޮމިޝަން އުފެއްދެވީ މި މަހުގެ 27 ގެ ދަންވަރުގެ ވަގުތެއްގައެވެ. އެންމެފުރަތަމަ އެމި ކޮމިޝަނުގެ މެންބަރުންގެ ގޮތުގައި ހިމެނުނީ، ޑރ. މުޙައްމަދު މުނައްވަރު، ގ. ހަސަންކާރިގެ އާއި ބްރިގޭޑިއަރ ޖެނެރަލް ރިޓަޔަޑް އަޙްމަދު މުޙައްމަދު، ވ. އަލްމާން އަދި ޑރ. މުޙައްމަދު ޙަބީބު، ސ. ހިތަދޫ، ސީސަންމާ އެވެ.
” ިތުފަންގި” އަށް މައުލޫމާތު ލިބުނުގޮތުގައި ހަބީބް އިސްތިއުފާ ދީފައި ވަނީ އޭނާ އާއި މި މައްސަލައިގައި ތުހުމަތު ކުރެވޭ ރައުދު އަހުމަދު ޒިލާލް އާއި އާއިލީ ގުޅުން އޮންނާތީއެވެ.
މި ކޮމިޝަނަށް ބަދަލުތަކެއް ގެނެސްފައިވާކަން ހާމަކޮށް ރައީސް އޮފީހުން ބުނީ، 21 އަހަރުގެ ހައްވާ ޔުމްނު ރަޝީދު ވެއްޓުނު މައްސަލަ ބަލައި، އެ މައްސަލައާ ގުޅިގެން މިނިވަން، މުސްތަޤިއްލު އަދި އިތުބާރު ހިފޭ ތަޙުޤީޤެއްކޮށް، އެ ހާދިސާގެ ޙަޤީޤަތް ހޯދައި، އެ ހާދިސާއާ ގުޅިގެން ކަމާބެހޭ މުއައްސަސާތަކުން މިހައިތަނަށް ކޮށްފައިވާ މަސައްކަތްތަކަކީ ކޮބައިކަން ބެލުމަށާއި، އެ މައްސަލައާއި ގުޅިގެން އަޅަންޖެހޭ ފިޔަވަޅުތައް އަޅައި، އެ މައްސަލައިގައި ކަންހިނގައިފައިވާގޮތް އިންސާފުވެރިކަމާއި ޢަދުލުވެރިކަމާއެކީ ތަޙުޤީޤުކޮށް، ލަފާ ދިނުމަށް ޓަކައި، މި މަހު 27 ގައި އުފެއްދެވި ކޮމިޝަނަށް، ރައީސް ބަދަލުގެންނަވާފައިވާ ކަމަށެވެ.
މި ބަދަލުތަކާއެކު، ހަބީބްގެ ބަދަލުގައި ކޮމިޝަނަށް ޑރ. މޫސާ މުރާދު އައްޔަންކުރުމުގެ އިތުރުން، ތ. ވޭމަންޑޫ، މޫނިމާގޭ ޖަބީން މުޙައްމަދާއި ހ. ހަބަރުގެ އާމިނަތު އީނާސް ވަނީ އެ ކޮމިޝަނަށް އައްޔަންކުރައްވާފައެވެ. އެހެންކަމުން މި ކޮމިޝަނުގައި މިހާރު ފަސް މެމްބަރުން ތިއްބަވާނެއެވެ. އެއީ ރައީސް އެއްގެ ގޮތުގައި ޑރ. މުނައްވަރުވެސް ހިމަނައިގެންނެވެ.
ކޮމިޝަނަށަ އަލަށް އައްޔަންކުރެވުނު އީނާސް، ރައީސް ޢަބްދުﷲ ޔާމީން އަބްދުލްގައްޔޫމްގެ ވެރިކަމުގައި ހިއުމަން ރައިޓްސް ކޮމިޝަން (އެޗްއާރުސީއެމް)ގެ ރައީސްކަން ކުރައްވައި، މި ސަރުކާރުން އުފެއްދި ފުލެޓާއި ގޯއްޗާ ބެހޭ ކޮމިޓީގައި ވެސް ހިމެނިވަޑައިގަންނަވައެވެ.
ރައީސްގެ ގަރާރަކުން މި ޚާއްސަ ކޮމިޝަން އުފެއްދެވީ އެ ކޮމިޝަނަށް ބޮޑެތި ބާރުތަކެއް ލިބިދޭ ގޮތަށެވެ. މި ކޮމިޝަނާ މަތިކުރެވޭ މަސައްކަތްތައް ފުރިހަމަވެއްޖެ ކަމަށް ރައީސް ކަނޑައެޅުއްވުމާ ހަމަޔަށް ކޮމިޝަން ދެމިއޮންނާނެ ކަމަށް ރައީސްގެ ގަރާރުގައި ވެއެވެ.
