ފޯޅަވަހި ހޯދުމަށް ރައްޔިތުންގެ ތެރެއިން ބަޔަކު ނުކުމެ ކުރަމުންދާ މަައްކަތަށް ދިވެހި ސަރުކާރުން ވަރަށް ބޮޑު އެއްބާރުލުމެއް ލިބިއްޖެކަން ފާހަގަ ކުރެވިއްޖެއެވެ.
މިކަން ހާމަވީ، ރާއްޖޭގެ ސިޔާދަތީ މިލްކުވެރިކަމާ ގުޅޭގޮތުން ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން މޮރިޝަސްއަށް ފޮނުވާފައިވާ ސިޓީ އަނބުރާ ގެނައުމަށް މި ސަރުކާރުން ނިންމާފައިވާކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ވިދާޅުވުމުންނެވެ.
ރައީސް މިހެން ވިދާޅުވީ މި އަހަރުގެ ރިޔާސީ ބަޔާނުގަައި ރާއްޖޭގެ ކަނޑުގެ ސަރަހައްދުން ބައެއް ގެއްލޭ ގޮތަށް ކުރީގެ ސަރުކާރުން ނިންމާފައިވާ ނިންމުންތަކާ ގުޅޭގޮތުން ވާހަކަފުޅު ދައްކަވަމުންނެވެ. މި ސިޓީއަކީ ދިވެހިރާއްޖޭގެ ކަނޑުގެ ސަރަހައްދުން ބައެއް އުނިވާގޮތަށް، ރާއްޖޭގެ މަސްލަހަތަށް އުނިކަން ލިބޭގޮތަށް ފޮނުވާފައިވާ ސިޓީއެއްގެ ގޮތުގައި މި ސަރުކާރުން ސިފަކުރެއެވެ.
ފޯޅަވަހި ހޯދުމަށް ދިވެހިންގެ ބަޔަކު ވެސް ނުކުމެ ވަރަށް ފުޅަ ދާއިރާގައި އެ މަސައްކަތް ކުރަމުންދާއިރު މިއީ އެބޭފުޅުންނަށް ވެސް ލިބުނު އިތުރު ހިއްވަރެކެވެ. ރައީސް ވިދާޅުވެފައި ވަނީ ޗާގޯސް އެންމެ ޙައްޤުކަން ބޮޑީ ދިވެހިރާއްޖެއަށެވެ.
