މޯލްޑިވްސް ޒަކާތު ހައުސްގެ ޑިރެކްޓަރ ޖެނެރަލްގެ މަޤާމަށް އައްޝައިޚް އިމްތިޠާއު ޢައްބާސް، ޒަކާތު ކައުންސިލުން އައްޔަން ކުރައްވައިފިއެވެ.
ޒަކާތުގެ ޤާނޫނުގެ ދަށުން އަލަށް އެކުލަވައިލި ޒަކާތު ކައުންސިލުން މި މަޤާމަށް ބޭފުޅަކު އައްޔަންކޮށްފައިވަނީ، އެ މަޤާމަށް ކުރިމަތިލުމުގެ ފުރުޞަތު ޢާންމުކޮށް ހުޅުވާލައި، ކުރިމަތިލީ ފަރާތްތަކާ އިންޓަރވިއު ކުރުމަށްފަހުގައެވެ.
ޒަކާތު ކައުންސިލުން މަޢުލޫމާތު ދެއްވިގޮތުގައި، ޝައިޚް އިމްތިޠާއު މި މަޤާމަށް ހޮވިވަޑައިގަތީ ކުރިމަތިލެއްވި ފަރާތްތަކުގެ ތަޢުލީމީ ފެންވަރާއި، މަސައްކަތުގެ ތަޖުރިބާ އަދި ޤާބިލުކަމަށް ބަލައި، އެ މަޤާމަށް އެންމެ އެކަށީގެންވާ ބޭފުޅަކީ އޭނާ ކަމަށް ފެންނާތީއެވެ.
ޒަކާތު ހައުސްގެ ޑިރެކްޓަރ ޖެނެރަލްގެ މަޤާމަށް އައްޔަންކުރެއްވުމުގެ ކުރިން ޝައިޚް އިމްތިޠާއު ހުންނެވީ އިސްލާމިކް މިނިސްޓްރީގެ ޑެޕިއުޓީ މިނިސްޓަރުގެ މަޤާމުގައެވެ.
މީގެ އިތުރުން އޭނާ ވަނީ އެ މިނިސްޓްރީގެ ސީނިއަރ ޕޮލިޓިކަލް ޑިރެކްޓަރުގެ މަޤާމާއި، ހެޑް އޮފް އިންޓަރނޭޝަނަލް ރިލޭޝަންސް ފަދަ މުހިންމު މަޤާމުތަކެއް ފުރުއްވާފައެވެ. އަދި ޒަކާތު ހައުސްގެ ޝަރީޢާ އެޑްވައިޒަރީ ކޮމިޓީގެ ވައިސް ޗެއަރގެ މަޤާމުވެސް އޭނާ ވަނީ ކުރިން އަދާކުރައްވާފައެވެ.
ތަޢުލީމީ ގޮތުން ބަލާއިރު، ޝައިޚް އިމްތިޠާއުއަކީ މަދީނާގެ އިސްލާމިކް ޔުނިވަރސިޓީން ޙަދީޘް ސައިންސަސްގެ ދާއިރާއިން ފުރަތަމަ ޑިގްރީ ހާސިލުކުރައްވައި، އިސްލާމިކް ޔުނިވަރސިޓީ އޮފް މޯލްޑިވްސްއިން ޖުޑީޝަލް ސައިންސަސް އެންޑް ޝަރީޢާ ޕޮލިސީގެ ދާއިރާއިން މާސްޓަރސް ޑިގްރީ ހާސިލުކުރައްވާފައިވާ ބޭފުޅެކެވެ. އަދި މިހާރު ގެންދަވަނީ އެ ދާއިރާއިން ޕީއެޗްޑީއަށް ކިޔަވާވިދާޅުވަމުންނެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ޒަކާތުގެ ނިޒާމު ހަރުދަނާކުރުމަށް ކުރައްވަމުންދާ މަސައްކަތްތަކުގެ ތެރެއިން، ޒަކާތު ހައުސްއަށް މިފަދަ ޤާބިލު ބޭފުޅަކު އައްޔަންކުރެއްވުމަކީ ޒަކާތުގެ ކަންކަން އިތުރަށް ފުޅާވެ، ހަރުދަނާވެގެންދާނެ ކަމެއް ކަމަށް ބެލެވެއެވެ.
