2025 ވަނަ އަހަރުގެ ދިރާސީ އަހަރުގެ ކިޔެވުން ނިމި ބޮޑު ޗުއްޓީ ފެށިއްޖެއެވެ.
މި އަހަރުގެ ދިރާސީ ކިޔެވުން ފެށީ، މިއަހަރުގެ އޭޕްރީލް މަހުގެ 7 ވަނަ ދުވަހުއެވެ. މި ދިރާސީ އަހަރު ސަރުކާރުގެ 217 ސްކޫލެއްގައި 84000 އެއްހާ ދަރުވަރުން ކިޔެވިއެވެ. އަދި މިހާރު މި ދިރާސީ އަހަރުގެ ކިޔެވުން ނިންމާ ދަރިވަރުން މިވަނީ ޗުއްޓީއަށް ގޮސްފައެވެ. ބައެއް ސްކޫލުތަކުގައި ދަރިވަރުންނަށް ރިޕޯޓް ފޯމް ދިނުމަށްޓަކައި އެކަން ކުލަގަދަކޮށް ފާހަގަކޮށްފައިވެއެވެ. މީގެ 4 އަހަރު ކުރިން ދިރާސީ އަހަރުގެ ކިޔެވުން ފެށީ، އަހަރުގެ މެދުތެރޭގައެވެ. އެއާއެކު ދަރިވަރުންނަށް ބޮޑު ޗުއްޓީ ލިބުނީ، ޖޫން ޖުލައިގެ ގަދަ ދުވަސްވަރުގައެވެ.
މިފަދަ އެތައް މައްސަލަތަކާ ގުޅިގެން އަދި ގިނަ އަދަދެއްގެ ބެލެނިވެރިންގެ އެދުމާއެކު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވީ، ދިރާސީ އަހަރުގެ ކިޔެވުން ޖެނުއަރީ މަހު ފަށާ ޑިސެމްބަރު މަހަށް ބޮޑު ޗުއްޓީ ލިބޭ ގޮތަށް ހަމަޖައްސައިދެއްވުމަށެވެ. އެއާއެކު މިއަހަރަކީ، 4 އަހަރަށްފަހު ދަރިވަރުންނަށް ޑިސެމްބަރު މަހު ބޮޑު ޗުއްޓީ ލިބޭ ފުރަތަމަ ފަހަރެވެ. ދަރިވަރުންނަށް މި ލިބުނު ޗުއްޓީގައި ކުރިއަށް އޮތް އަހަރަށް ތައްޔާރުވުމަށް ގަދަ އަޅާ މަސައްކަތް ކުރުން މުހިއްމެވެ. އަދި ދަރިވަރުންގެ ގްރޭޑްތައް ބަދަލުވުމާއި، ޘާނަވީ އަދި މަތީ ޘާނަވީ ދަރިވަރުންގެ އިމްތިހާނުތަކަށް މި ޗުއްޓީގައި ތައްޔާރުވުން މުހިއްމެވެ. މީގެއިތުރުން ކުޅިވަރާއި މަޖަލުގައި އުޅުމުގެ އިތުރަށް ފިލާވަޅުތައް މުޠާލިއާކޮށް ޢިލްމީ އަޚްލާޤީ މޮޅު ދަރިވަރަކަށް ވުމަށް ގަދައަޅާ މަސައްކަތް ކުރަންވެސް ވާނެއެވެ.
އެކަޑަމިކް ކަލަންޑަރުގައި ވާގޮތުން އަންނަ ދިރާސީ އަހަރު ފެށޭނީ، ޖެނުއަރީ މަހުގެ 27 ވަނަ ދުވަހުއެވެ. އަދި ފުރަތަމަ ޓާމުގެ މިޑް ބްރޭކް މެއި މަހުގެ 24 އިން 30 އަށް ލިބޭއިރު، ފުރަތަމަ ޓާމުގެ ކިޔެވުން ނިންމާ ދަރިވަރުންނަށް ޗުއްޓީ ލިބޭނީ، ޖުލައި މަހުގެ 17 އިން އޯގަސްޓް މަހުގެ ފުރަތަމަ ދުވަހާއި ހަމައަށެވެ.
