މަސްވެރިންނަށް އަގުހެޔޮކޮށް ތެޔޮ ފޯރުކޮށްދިނުމަށް ސަރުކާރުން ވެފައިވާ ވަޢުދާއި އެއްގޮތަށް ފުރަތަމަ އެސްޓީއޯ ފިއުލް ޝެޑް ރ. އަތޮޅު ދުވާފަރުގައި، ރައީސުލް ޖުމްހޫރިއްޔާ ޑރ. މުޙައްމަދު މުޢިއްޒު މިއަދު އިފްތިތާޙް ކޮށްދެއްވައިފިއެވެ.
މިއާއި އެކު މަސްވެރިންނަށް ދިމާވާ ތެލާއި ގުޅުން ހުރި ދަތިތަކަށް ވަރަށް ބޮޑަށް ލުއި ލިބިގެން ދާނެއެވެ.
ސަރުކާރުން މި މަސައްކަތް ފަށާފައިވަނީ ބޮޑު ކަންނެލީގެ މަސްވެރިންގެ އޮޕަރޭޝަނަލް ޚަރަދު ކުޑަކުރުމަށް އެހީތެރިވެދިނުމަށެވެ.
މަސްވެރިކަމުގެ ޢާއިލާތަކަށް އެހީތެރިވުމަށް ސަރުކާރުން މުޅި ރާއްޖޭގައި ހިންގާ ޕްރޮގްރާމަކާއެކު، ކޮންމެ އަތޮޅެއްގައި މަދުވެގެން ތެޔޮ ފޯރުކޮށްދޭ އެއް ނިޒާމް ޤާއިމްކޮށް، އަގުހެޔޮ ކޮށް ފަސޭހައިން ތެޔޮ ލިބޭނެ ގޮތް ހެދުމަކީ ސަރުކާރުގެ އަމާޒެވެ.
މަސްވެރިކަމުގެ ސިނާޢަތަކީ މިހާރުގެ ސަރުކާރުން އެންމެ އިސްކަމެއްދޭ އެއް ސިނާޢަތް ކަމުގައި ރައީސް ވަނީ ތަކުރާރު ކޮށްދެއްވާފައެވެ.
